იმერეთის გუბერნატორი მოსახლეობას მიმართავს, ამაღამ თავი შეიკავონ პიროტექნიკის გამოყენებისგან, რადგან ქარის გამო ხანძრის საფრთხე არსებობს

იმერეთის გუბერნატორ ზვიად შალამბერიძის განცხადებით, იმერეთის რეგიონში სტიქიის შედეგად გამოწვეული ზიანის აღმოსაფხვრელად შესაბამისი ჯგუფები 24 საათის განმავლობაში მუშაობენ.

მისივე თქმით, შესაძლებლობის ფარგლებში, ყველა სახის სამუშაოები მოკლე დროში ხორციელდება.

ამასთან, ზვიად შალამბერიძემ მოუწოდა მოსახლეობას, დღეს ღამით თავი შეიკავონ პიროტექნიკის გამოყენებისგან, რადგან შესაძლოა, ამან ხანძარი გამოიწვიოს.

„მეოთხე დღეა, გრძელდება სტიქია იმერეთის რეგიონში. რეგიონის მასშტაბით, დღეისათვის 600-მდე შენობა გვაქვს დაზიანებული. ამ ეტაპზე 150-მდე სოფელს ელექტროენერგია არ მიეწოდება, გვაქვს პრობლემები გაზისა და წყლის მიწოდების კუთხითაც, თუმცა შესაბამისი ჯგუფები, როგორც აქამდე, ახლაც პრობლემების აღმოფხვრაზე 24 საათის განმავლობაში მუშაობენ. რაც შესაძლებელია, ყველა სახის სამუშაოებს მოკლე დროში ვახორციელებთ. აქვე, მინდა, მივმართო ჩვენს მოსახლეობას, განსაკუთრებით იმერეთის მოსახლეობას, და ვთხოვო, რომ დღეს, ღამით მაქსიმალურად ყველამ შევიკავოთ თავი პიროტექნიკის გამოყენებისგან. იცით, რომ ქარი ძლიერია, ძალიან ბევრი შენობის სახურავია გადახდილი და არის საშიშროება, წარმოიქმნას ხანძრები. გთხოვთ, გავითვალისწინოთ და ნუ მივაყენებთ ზიანს ერთმანეთს“, – განაცხადა ზვიად შალამბერიძემ.

ასევე დაგაინტერესებთ:

🔵"ახლა ნეაპოლი ქართველთა ქალაქია" - ნიკოლოზ წულუკიძე