მე-100 მატჩი და დამშვიდობება „ვალენსიასთან“? - As-ი მამარდაშვილზე

ესპანური გამოცემა As-ი გიორგი მამარდაშვილის შესახებ წერს, რომელმაც შეიძლება 25 მაისს, ვიგოს „სელტას“ წინააღმდეგ „ვალენსიაში“ ბოლოჯერ ითამაშოს.

აღსანიშნავია, რომ ეს გიორგისთვის „ღამურების“ რიგებში მე-100 ოფიციალური თამაში იქნება და ესპანურ გაზეთშიც ამ დამთხვევაზე დაწერეს.

„გიორგი მამარდაშვილი „მესტალიას“ გასულ კვირას, ჟირონასთან წაგების შემდეგ დაემშვიდობა. საფინალო სასტვენის შემდეგ, დაფიქრებულმა ქართველმა მეკარემ აპლოდისმენტები უძღვნა ტრიბუნებს და ვალენსიას ლოგოს აკოცა. ბევრისთვის ეს ჟესტი იმ სახლთან გამომშვიდობების მანიშნებელი იყო, რომელშიც 2021 წლიდან მოყოლებული იყო. მოგვიანებით გაირკვა, რომ მამარდაშვილზე ვაჭრობაში ნიუკასლი ჩაება. პირველი მოლაპარაკებები უკვე შედგა და ვალენსია ევროპის ერთ-ერთი საუკეთესო მეკარის სანაცვლოდ 40 მილიონ ევროზე მეტის მიღებას იმედოვნებს.

მომავალ სეზონში მამარდაშვილი შესაძლოა პრემიერლიგაში აღმოჩნდეს, თუმცა “ღამურები” მის გაყიდვას არ ჩქარობენ. კლუბმა ყოველი შემთხვევისთვის სტოლე დიმიტრიევსკი ორი სეზონით დაიბევა. თუმცა, რაც არ უნდა მოხდეს ამ ზაფხულს, მამარდაშვილისთვის ამ კვირის თამაში სელტასთან განსაკუთრებული იქნება. შესაძლოა, ქართველმა თავის „ვალენსიურ“

კარიერას წერტილი ვიგოში დაუსვას.

ამ დაპირისპირებას სიმბოლური მნიშვნელობა ექნება, თუკი ის წავა, მაგრამ არის სხვა ასპექტიც, რომელიც გიორგისთვის დასამახსოვრებელს გახდის „ბალადიოსზე“ გასამართ მატჩს.

ქართველი მეკარე სელტასთან მე-100 ოფიციალურ მატჩს მიითვლის ვალენსიას მაისურით, თუკი რუბენ ბარახა ბოლო ტურში შემადგენლობაში სწორედ მას დააყენებს. მამარდაშვილმა, რომელიც კლუბში 2021 წელს, სარეზერვო გუნდში სათამაშოდ მოვიდა, სწრაფად მოახერხა ხოსე ბორდალასის ნდობის მოპოვება. ქართველმა მწვრთნელისგან შანსი მიიღო და ის ბრწყინვალედ გამოიყენა.

მამარდაშვილმა ვალენსიას შემადგენლობაში აქამდე 99 მატჩი ჩაატარა, თუმცა, ეჭვგარეშეა, რომ ბოლო სეზონი მისთვის საუკეთესო იყო „ღამურების“ მაისურით და შედეგად, დღეს მზად არიან კლუბები, მასში 40 მილიონ ევროზე მეტი გადაიხადონ“, - წერს As-ი.