„პრეზიდენტის ვეტო სალომე ზურაბიშვილის მხრიდან, კონსტიტუციის არცოდნის და უპატივცემულობის მორიგი დასტურია“ - დავით ჩიხელიძე

საქართველოს პრეზიდენტის სალომე ზურაბიშვილის მიერ „უცხოური გავლენის გამჭვირვალობის შესახებ” კანონზე ვეტოს დადების საკითხს „დემოკრატიული ცვლილებების ცენტრის“ ხელმძღვანელი დავით ჩიხელიძე გამოეხმაურა და თქვა, რომ „პრეზიდენტის ვეტო, სალომე ზურაბიშვილის მხრიდან, კონსტიტუციის არცოდნის და უპატივცემულობის მორიგი დასტურია“.

„პრეზიდენტის ვეტო, სალომე ზურაბიშვილის მხრიდან, კონსტიტუციის არცოდნის და უპატივცემულობის მორიგი დასტურია. საქართველოს კონსტიტუციის 42-ე მუხლის მე-2 პუნქტი პირდაპირ ამბობს, რომ „საქართველოს პრეზიდენტი 2 კვირის ვადაში ხელს აწერს და აქვეყნებს კანონს ან მოტივირებული შენიშვნებით უბრუნებს პარლამენტს” ხაზგასმით წერია, რომ პრეზიდენტი კანონს ან ხელს აწერს, ან მოტივირებული შენიშვნებით უბრუნებს პარლამენტს.

კიდევ ერთი კანონი რომელიც უფრო დაწვრილებით განმარტავს ვეტოს შესაძლებლობას ამბობს რომ “ საქართველოს პრეზიდენტი უფლებამოსილია კანონპროექტს დადგენილ ვადაში ხელი არ მოაწეროს და მოტივირებული შენიშვნებით დაუბრუნოს იგი პარლამენტს” (საქართველოს პარლამენტის რეგლამენტი მუხლი 170, პუნქტი 1) ორივე კანონი უშვებს შესაძლებლობას პრეზიდენტმა გამოიყენოს ვეტოს უფლება, მაგრამ კანონპროექტი უკან მოტივირებული შენიშვნებით უნდა დაბრუნდეს, ვეტოს მთავარი არსი, სწორედ მოტივირებული შენიშვნებია, რაც პრეზიდენტის მიერ დაწუნებულ კანონპროექტს თან უნდა ახლდეს.

საქართველოს ისტორიაში ვეტოს დადება მოტივირებული შენიშვნების გარეშე ჯერ არ ყოფილა, სალომე პირველი პრეზიდენტია, რომელმაც კონსტიტუცია არაერთგზის დაარღვია, რა თქმა უნდა თეორიულად შესაძლებელია პრეზიდენტმა კანონს ხელი არ მოაწეროს და პარლამენტს მოტივირებული შენიშვნების გარეშე გადაუგზავნოს, მაგრამ ეს პირდაპირ და ირიბად ნიშნავს, რომ პრეზიდენტი არა საჭიროებისამებრ, არამედ პირადი ეგოს დაკმაყოფილებისთვის მოქმედებს, ვერ გამოდის ჩამოუყალიბებელი ბავშვის პოზიციიდან, რომელიც მოქმედებს პრინციპით, "მე ასე მინდა" და რაციონალური გადაწყვეტილების მიღების უნარს მოკლებულია“, - აცხადებს ჩიხელიძე.