ქართული შობა ფლორენციაში - რეპორტაჟი წმინდა ნინოს სახელობის ტაძრიდან

შობის დღესასწაულს, ისევე როგორც მართლმადიდებლური სამყაროს უდიდესი ნაწილი, იტალიაში მცხოვრები ქართველი ემიგრანტებიც განსაკუთრებულად აღნიშნავენ. ჩვენ ფლორენციაში არსებულ წმინდა ნინოს სახელობის  ქართულ-მართლმადიდებლურ ტაძარში აღვლენილ საშობაო წირვას დავესწარით და გვინდა იქ მიღებული ემოციები, შეძლებისდაგვარად თქვენც გაგიზიაროთ.

ფლორენციაში ქართული სამრევლო 2011 წლის იანვრის თვეში დაარსდა, იტალიაში მცხოვრები ქართველი ემიგრანტების მონდომებითა და დასავლეთ ევროპის ეპარქიის მიტროპოლიტ აბრაამ გარმელიას ლოცვა-კურთხევით. სამრევლოს დაარსების დღიდან არქიმანდრიტი ანდრია ლაცაბიძე უძღვება.

ტაძრის დაარსებიდან, სულ ცოტა ხანში, 2013 წლის ოქტომბერ-ნოემბრის თვეში დაარსდა ტაძართან არსებული ქართულ-ხალხური სიმღერისა და ცეკვის ანსამბლი „ნანილა“, რომლის მგალობელთა გუნდის საგალობლებიც გესმით სიუჟეტში.

ტაძარში მუდმივად, წესისამებრ აღევლინება წირვა-ლოცვა, მაგრამ დიდ დღესასწაულებზე აქ განსაკუთრებული ზეიმია. წელსაც, შობის წირვას, რომელიც ღამისთევით ჩატარდა, იტალიის სხვადასხვა კუთხიდან ჩამოსული ქართველი ემიგრანტები ესწრებოდნენ და ჰქონდათ ბედნიერება, საშობაო წირვა-ლოცვა ქართულ ენაზე მოესმინათ.

ნინა მამუკაძე

იტალია, ფლორენცია