“13 წლიანი ემიგრანტობაც დასრულდა” - ყოფილი ემიგრანტი ნანა შველიძე

"ყველა მიყვარხართ და არ დამავიწყდებით. მალე ჩემს მონატრებულ და ძვირფას ოჯახს ჩავეხუტები" - ქართველი ემიგრანტი ნანა შველიძე, რომელიც იტალიაში წლების მანძილზე ცხოვრობდა, საქართველოში ბრუნდება. ამის შესახებ მან სოციალურ ქსელში დაწერა:

"13 წლიანი ემიგრანტობაც დამთავრდა. მადლობა უფალს ყველა განვლილი გზისთვის, მადლობა იტალიას, მადლობა ჩემს შეძენილ მეგობრებს იტალიაში. მალე თქვენც დაჰბრუნებოდეთ ოჯახებს. ყველა მიყვარხართ და არ დამავიწყდებით. მალე ჩემს მონატრებულ და ძვირფას ოჯახს ჩავეხუტები."

იმდენად იშვიათი და ამაღელვებელი ფაქტია, როდესაც ვინმე ემიგრაციიდან ამდენი წლის შემდეგ ბრუნდება, გადავწყვიტეთ ავტორს დავკავშირებოდით.

ნანა შველიძე: საქართველოში დღეს ვბრუნდები. ახლა მილანის აეროპორტისკენ მიმავალ ტრანსპორტში ვარ, მაგრამ ვეცდები გიპასუხოთ...

- როდესაც ემიგრაციაში წასვლა გადაწყვიტეთ, რა გეგმები გქონდათ და რამდენი ხნით აპირებდით დარჩენას?

- ვითომ ორი წლით წამოვედი. ვფიქრობდი, ჩემს გოგონას სწავლის ფულს დავუგროვებ და დავბრუნდები-მეთქი, მაგრამ 13 წელი შევასრულე. აქედან 10 წელი ფლორენციაში ვმუშაობდი.

- ნანა, რას ეტყოდით იმ ემიგრანტებს, რომლებსაც ჯერ კიდევ ვერ გადაუწყვეტიათ სამშობლოში დაბრუნება?

- ემიგრანტებს ვურჩევ, რომ თუ თქვენ არ დაუსვამთ წერტილს ემიგრაციას, ოჯახს სულ უფრო მეტი მოთხოვნა ექნება. გამძლეობას ვუსურვებ ყველას, პრობლემების მოგვარებას და ოჯახებში მალე დაბრუნებას.

- მშვიდობით დაბრუნებას და წარმატებებს გისურვებთ...

- უღრმესი მადლობა, თქვენც დიდ წარმატებას გისურვებთ!

ნინა მამუკაძე

იტალია, ფლორენცია