ბოლონიის მთავარეპისკოპოსმა უკრაინელ ერს პატიება, ბოროტების ირიბად თანამონაწილეობისთვის სთხოვა

ბოლონიის კათოლიკური ეკლესიის მთავარეპისკოპოსმა, მატეო მარია ზუპიმ სააღდგომო ლიტურგიის ჩატარებისას უკრაინაში ომის შეწყვეტის და დაზავების  აუცილებლობაზე ისაუბრა. წმინდა პეტრეს სახელობის საკათედრო ტაძრის ამბიონიდან, მთავარეპისკოპოსმა სოლიდარობა იმ ადამიანებს გამოუცხადა, რომლებიც იძულებულნი გახდნენ ომის გამო ქვეყანა დაეტოვებინათ.

"ქრისტეს აღდგომა არის მშვიდობა" - განმარტა ბოლონიის მთავარეპისკოპოსმა. 
,,ეს არის გამარჯვება ბოროტებაზე და სიკვდილზე, რომელიც ყველაზე უკუნით სიბნელესაც კი ანათებს. ეს არის სინათლის ის ნაპერწკალი, რომელიც გვაგრძნობინებს უფლის უსაზღვრო სიყვარულს ამდენი სირთულეების ჟამსაც კი. დღეს დილით საკათედრო ტაძარი აავსო უკრაინულმა საზოგადოებამ, რომლებიც აქ მოვიდნენ ცრემლიანი თვალებით. ქალები, რომლებიც გულით დაატარებენ ქრისტეს ჯვარს. ისინი ეძებდნენ ნუგეშს ლოცვის სახით, რომელიც შუამდგომელი უნდა გახდეს მშვიდობისთვის. 
ვთხოვთ მათ პატიებას, ამქვეყნიური მსოფლიო ბოროტების თანამონაწილეობისთვის და იმის გამოც, რომ რაც უკრაინაში ხდება შორიდან ვუყურებდით."

ქადაგების დროს მთავარეპისკოპოსმა  აღნიშნა, არ დაეჯერებინათ მრავალი ცრუ მითი, როგორიცაა იარაღის მეშვეობით მშვიდობის დამყარება:
,,იესო ქრისტე გვახსენებს, რომ ბოროტება არსებობს, მაგრამ ჩვენ მისი ეს სიტყვები სერიოზულად არ მივიღეთ. მან იქვე დასძინა, რომ სიყვარული არ არის მარტივი, გამამხნევებელი, მხოლოდ  მოგებიანი გამოსავალი. უფალი არ გვთხოვს ბოროტებისგან გაქცევას, არამედ ის გვეუბნება, დავამარცხოთ ის სხვების სიყვარულით. ჩვენზეა დამოკიდებული რომელ მხარეს დავდგებით უფლის სიტყვების, ნაციონალიზმის თუ იარაღის მწარმოებლების."

ქადაგების დასასრულს მთავარეპისკოპოსმა კიდევ ერთხელ გაიმეორა, რომ უარი უნდა ვუთხრათ ბოროტებასთან ნებისმიერი სახის თანამშრომლობას და დავადგეთ მშვიდობის გზას.

წყარო: Resto Del Carlinoნონა გედენიძე სპეციალურად ExclusiveTV-თვის რეჯიო-ემილიადან