“ეს ამბავი კარგ იტალიელს და ცუდ ქართველს ეხება” - ემიგრანტი იტალიიდან

"მივედი ბინაში, თითქოს ყველაფერი ჩვეულებრივად მიდიოდა ვიდრე ის ერთი გადამწყვეტი დღე არ დადგა, როცა ბინაში მცხოვრებმა უხასიათო გოგომ ტონს არ აუწია" - იტალიაში მცხოვრები ქართველი ემიგრანტი სოფო გუნაშვილი, არც ისე სასიამოვნო ისტორიას ჰყვება, რომელიც იტალიაში ქართველებთან დაკავშირებით გადახდა თავს:

"მომინდა ერთი ამბავი მომეყოლა. არ ვიცი გახსოვთ თუ არა, ჩემი ამბავი იტალიაში ახალ ჩამოსულს რომ გამიმართლა და კარგი ოჯახი შემახვედრა უფალმა.

ვმუშაობდი ბებოსთან, რომელიც მხოლოდ ღიმილით გამოხატავდა მადლიერებას. გადასარევი ხალხი, განა მარტო შვილები, არამედ მთელი სანათესავო.

მოკლედ, ვიყავი გემრიელად... 1 წელი და 6 თვე ვიმუშავე და სამწუხაროდ ბებია გარდაიცვალა. დავრჩი ამ სახლში ერთი თვე. ამასობაში ეძებდნენ ჩემთვის სამსახურს ისეთს, რომ რთული არ ყოფილიყო და არ მეწვალა ბევრი. მოვიფიქრე და ვუთხარი, რომ სხვა ქალაქში მინდოდა წასვლა. დიდად არ მოეწონათ ეს ამბავი მიზეზად კი დამისახელეს, შენ რომ რამე გაგიჭირდეს, შორს ვიქნებით და ვერ შევძლებთ დროულად მოსვლასო.

არ დავუჯერე და წამოვედი. კი არ წამოვედი, წამომიყვანეს თავად. წავედი იმ სხვა ქალაქში, ბინა უკვე ნანახი მქონდა. მიმიყვანეს, გადამატანინეს ჩემი ნივთები და შემაცილეს სახლში. კართან დახვდათ ბინის მეპატრონე ქართველი და კიდე ერთი ქართველი, რომლებმაც ciao-ც კი არ უთხრეს, არ მიესალმნენ იმ იტალიელებს, რომლებმაც მე, ქართველი, ქალაქიდან სხვა ქალაქში თავისი ხარჯებით ჩამიყვანეს. შემომხედეს გულდაწყვეტით და მითხრეს თუ რამე გაგიჭირდა დაგვირეკეო (ალბათ გული უგრძნობდათ, რომ მალე დავრეკავდი).

მივედი ბინაში, თითქოს ყველაფერი ჩვეულებრივად მიდიოდა ვიდრე ის ერთი გადამწყვეტი დღე არ დადგა, როცა ბინაში მცხოვრებმა უხასიათო გოგომ ტონს არ აუწია. მე იმდენად მშვიდი ვარ არ შემიძლია კონფლიქტში შესვლა, თუ შევალ კონტროლს ვკარგავ, ამიტომ გაცლას ვამჯობინებ (თან მაშინ უფრო გამოუცდელი ვიყავი)!

შევედი ოთახში და ვრეკავ ბებოს შვილთან.ვუთხარი რომ დაბრუნება მინდოდა ისევ მათ ქალაქში. მან მითხრა ველოდი შენს ზარს,ისედაც მივხვდი სიტუაცია არ იქნებოდა კარგიო. მოვიდნენ დილას და წამიყვანეს უკან. ეს პოსტი კონკრეტულად კარგ იტალიელს და კონკრეტულად ცუდ ქართველს ეხება. ცუდი ქართველიც არსებობს და იტალიელიც.

მშვიდობას და გამართლებას გისურვებთ ცხოვრებაში. არავინ დაიწყოთ ლანძღვა ძალიან გთხოვთ. არც ქართველების სალანძღავად დამიწერია და არც იტალიელების. ეს ჩემი, ერთი ადამიანის ამბავია, რომელიც მინდოდა დამეწერა."