გაიგეთ, რა შეზღუდვები დაწესდა საშობაოდ იტალიაში, ქალაქების მიხედვით!

შობის მოახლოებასთან ერთად, ვირუსით დაინფიცირების პოტენციური ზრდის გამო, იტალიის ხელისუფლების შიშიც იზრდება. სწორედ ამიტომ, სადღესასწაულო პერიოდში, მთელ რიგ ქალაქებში შეზღუდვები დაწესდა, მიუხედავად იმისა, რომ მათი უმრავლესობა თეთრ ზონებს განეკუთვნებიან და მსგავსი რეგულაციები არ უნდა მოქმედებდეს. 
ვნახოთ, რა შეზღუდვებია სხვადასხვა რეგიონებსა და ქალაქებში.

კამპანიის რეგიონი - გუბერნატორმა ვინჩენცო დე ლუკამ გასცა ბრძანებულება, რომლის თანახმადაც, რეგიონის მასშტაბით აიკრძალა მოედნებზე დღესასწაულის გამართვა და თავყრილობები. ეს ეხება როგორც შობას, ასევე ახალ წელს. აგრეთვე აიკრძალა დიპლომის დაცვისა და დაბადების დღეების აღნიშვნა დახურულ სივრცეებში. სადილზე და ვახშამზე შეკრების შემთხვევაში, სტუმრები ვალდებულები იქნებიან დარჩნენ მაგიდებთან. ნიღბის ტარება სავალდებულოა ყველგან, ღია სივრცეშიც. 

ნეაპოლი - არც ნეაპოლის მერიას სურს რისკზე წასვლა. სან გრეგორიო არმენოს ქუჩაზე, რომელიც თავისი ულამაზესი პრეზეპეთია ცნობილი, მუნიციპალურ პოლიციას ხალხმრავლობის შემთხვევაში, მოძრაობის გადაკეტვის უფლება ექნება. 

ლაციო - ნიკოლა ძინგარეტის გადაწყვეტილებით, 23 დეკემბრიდან მთელი რეგიონის ტერიტორიაზე სავალდებულო იქნება ნიღბის ტარება. რომში აღნიშნული შეზღუდვა უკვე არსებობდა და მოიცავდა ქალაქის ცენტრსა და ე.წ. საშოპინგო ზონებს. 

რომი - პრეფექტურასა და ადგილობრივ სამართალდამცველებს, ხალხმრავლობის შემთხვევაში ქუჩების გადაკეტვის უფლება ექნებათ. „ექსპერიმენტი“ უკვე ჩატარდა ქალაქის განსაკუთრებით ხალხმრავალ ქუჩებზე.

ვენეტო - აღნიშნული რეგიონის გუბერნატორმა ლუკა ძაიამ 18 დეკემბერს ხელი მოაწერა ბრძანებულებას, რომლის თანახმადაც ორშაბათიდან მთელ რეგიონში ნიღბის ტარება ღია სივრცეშიც სავალდებულო გახდა. 

მილანი - მილანის მერი ჯუზეპე სალა, ერთ-ერთი პირველი იყო, რომელმაც თეთრი ზონის მიუხედავად, ქალაქის ცენტრში, ნიღბის ტარება ღია სივრცეშიც სავალდებულო გახადა. რეგულაცია ზუსტად წლის ბოლომდე გავრცელდება. 

ტურინი - გაუქმდა საშობაო ბაზრობა კასტელოს მოედანზე. დაწესდა ცენტრში, ღია სივრცეში ნიღბის ტარების ვალდებულება 24 საათის განმავლობაში, ხოლო გარეუბნების ხალმხრავალ ზონებში 17.00-დან  დილის 6.00 საათამდე. 

ბოლონია - საშობაო ბაზრობები არ აკრძალულა, მაგრამ ისევე როგორც სხვა დიდი ქალაქების შემთხვევაში, ნიღბის ტარება ღია სივრცეში, აქაც სავალდებულოა. აიკრძალა ღია ცის ქვეშ კონცერტები.

ფლორენცია - სავალდებულოა ნიღბის ტარება ღია სივრცეშიც. სადღესასწუალო პერიოდში, საფეხმავლო ქუჩები გახდება ცალმხრივი და აიკრძალება ქალაქის ცენტრში ავტომობილით გადაადგილება.

ნიღბის ტარების ვალდებულება ასევე ვრცელდება შემდეგ დიდ და პატარა ქალაქებზე : ბერგამო, გენუა, ვენეცია, პადოვა, ლეჩე, ლატინა, ესტე, კუნეო, ფუმიჩნო, ალბანო ლაციალე, აპრილია, ამელია, ფოლინო.