იტალია დაბალი შემოსავლების მქონე პირებზე, 200 ევროს დახმარებას გასცემს, მათ შორის ბადანტეებსა და მოახლეებზე

იტალიის მთავრობამ 6,5 მილიარდი ევროს ოდენობის დახმარების ახალი ბრძანებულება გამოსცა. ეკონომიკური დახმარების, ფულადი კომპენსაციის შესახებ განკარგულება 2 მაისის საღამოს, მინისტრთა საბჭომ განიხილა.

დამტკიცდა, რომ დაახლოებით 28 მილიონი ადამიანისთვის გაიცემა სახელმწიფოს მხრიდან ერთჯერადი ფულადი კომპენსაცია. ივლისის თვეში ყველა დასაქმებული, პენსიონერი უმუშევარი, თვითდასაქმებული, სეზონურად მომუშავე თუ ოჯახში დასაქმებული ადამიანი(Colf, Badante), რომელთა შემოსავალი წელიწადში არ აღემატება 35 000 ევროს, სახელმწიფოსგან ერთჯერადად მიიღებენ 200 ევროს ოდენობის დახმარებას.

მთავრობის ახალი დადგენილებით, სუბსიდია დასაქმებული პირებისთვის, პირდაპირ ივლისის თვის სახელფასო ფურცელში გაიწერება. შესაბამისად, მისი გადახდა დაეკისრება დამსაქმებელს, რომელიც შემდგომ სახელმწიფოს მხრიდან ანაზღაურდება.

რაც შეეხებათ პენსიონერებს, ისინი ერთჯერად დახმარებას 200 ევროს ოდენობით მიიღებენ პენსიასთან ერთად, 1 ივლისს. თვითდასაქმებული კატეგორიის პირებისთვის კი, მთავრობა აყალიბებს დროებით ფონდს და შემწეობის გაცემის  მეთოდებზე მუშაობს. ერთჯერადი დახმარება მათთვისაც ივლისის თვეში გაიცემა. იტალიის მთავრობამ 200-ევროიანი ფულადი კომპენსაციის გაცემის გადაწყვეტილება მოსახლეობისთვის, ინფლაციის გამო და ქვეყანაში ზოგადი ეკონომიკური სიტუაციის გათვალისწინებით მიიღო.

ნონა გედენიძე სპეციალურად ExclusiveTV-თვის რეჯო-ემილიადან