იტალია, ევროპის სხვა ქვეყნებთან ერთად, არალეგალი და თავშესაფრის მთხოვნელი მიგრანტების კონტროლს და მონაცემთა ბაზის შექმნას იწყებს?!

იტალიურ პრესაში ვრცელდება ინფორმაცია, რომ ევროკომისიას, არალეგალური მიგრაციის გაკონტროლების მიზნით, სკრინინგის დანერგვა სურს. განსაკუთრებული აქცენტი კეთდება იმ ქვეყნებზე, სადაც უცხოელები საზღვაო გზით, ნავებით შემოდიან. მათ შორისაა იტალიაც.

ევროკომისია ევროპის ქვეყნებში არალეგალური გზით შემოსული და თავშესაფრის მთხოვნელი უცხოელების კონტროლს ითხოვს, რათა თავიდანვე ნათელი იყოს, წარმოადგენენ თუ არა ეს ადამიანები რისკს ევროპის უსაფრთხოებისთვის.

ეს გულისხმობს მონაცემთა საერთო ბაზის შექმნას, რომელიც იქნება ცენტრალიზებული და მონაცემები იქნება შეტანილი ყველა იმ პირზე, რომლებიც სისხლის სამართლის დანაშაულისთვის არის გასამართლებული ევროკავშირის წევრ ქვეყნებში. ჯერ არ არის ნათელი, ვინ იქნება პასუხისმგებელი შემოწმებებზე და ვინ, სისტემის შეცდომით, ან ბოროტად გამოყენების შემთხვევაში.

პროცესი მოითხოვს მონაცემთა ძალიან დიდი მასშტაბის ანალიზს: შესვლა/გასვლის სისტემა (Ees), ევროპის სამოგზაურო ინფორმაციისა და ავტორიზაციის სისტემა (Etias), შენგენის ზონის საინფორმაციო სისტემა (Sis), სავიზო საინფორმაციო სისტემა (Vis), ევროპოლის მონაცემთა ბაზა, ინტერპოლის მონაცემთა ორი ბაზა და ევროპული სისხლის სამართლის ჩანაწერების საინფორმაციო სისტემა არაწევრი ქვეყნის მოქალაქეებისთვის (Ecris-Tcn). სწორედ ეს უკანასკნელი აგროვებს ინფორმაციას ევროკავშირის არაწევრი ქვეყნების მოქალაქეების შესახებ, რომლებიც სისხლის სამართლის, ან ტერორიზმის ბრალდებით არიან გასამართლებულნი ერთ-ერთ წევრ ქვეყანაში. 

ამ ეტაპზე, მხოლოდ არალეგალ და თავშესაფრის მთხოვნელთა კონტროლის საკითხია დღის წესრიგში, მაგრამ გამორიცხული არ არის, რომ მსგავსი ტიპის სკრინინგი, ევროკავშირში შემსვლელ ყველა პირზე დაწესდეს.