იტალია მინიმალურ სახელფასო ზღვარს ზემოთ სწევს, მაგრამ შესაძლოა ხელფასების მომატება “ბადანტეებს” არ შეეხოთ?!

იტალიაში კვლავ გააქტიურდა საკითხი მინიმალური სახელფასო განაკვეთის გაზრდის შესახებ, რომელიც სახელმწიფომ უნდა განსაზღვროს, რის შემდეგაც დამსაქმებელს დადგენილ თანხაზე ნაკლების გადახდა, კანონით აეკრძალება. 

ამ მხრივ იტალიაში, ევროპის სხვა ქვეყნებისგან განსხვავებით, არც თუ ისე სახარბიელო პირობებია. იქიდან გამომდინარე, რომ საკითხს კანონი არ არეგულირებს, დამსაქმებლები ხშირად გარკვეული მექანიზმების გამოყენებით, ინდივიდუალურად განსაზღვრავენ მათ მიერ დაქირავებული პირების ხელფასს. 

აღნიშნული ცვლილების განხორციელების შემთხვევაში, არაერთ სექტორში დასაქმებულ მოქალაქეებს, ხელფასი მნიშვნელოვნად გაეზრდებათ. ერთ-ერთი ასეთია კერძოდ, ოჯახებში მომვლელებად, ძიძებად, შინამოსამსახურეებად დასაქმებული პირების კატეგორია. 

ამ კატეგორიის გამორიცხვას მოითხოვს ასოციაცია "დომინას" პრეზიდენტი ლორენცო გასპარინი, რადგან "ბადანტეებისთვის" და მოახლეებისთვის ხელფასის მომატება, უმძიმეს ტვირთად დააწვებათ ისედაც სავალალო მდგომარეობაში მყოფ იტალიელ ოჯახებს. ეს ყველაფერი კი პარალელურად გამოიწვევს არალეგალური სამუშაო ადგილების შექმნას. აღნიშნული ასოციაცია იმ ოჯახების უფლებებს იცავს, რომლებსაც კერძო პირები ჰყავთ საკუთარ მოხუცებთან, ან ოჯახებში დასაქმებული.

ბოლო მონაცემებით ოჯახებში დასაქმებულ პირთა 57% ისედაც "შავად", კონტრაქტის გარეშე მუშაობს. ზემოთ აღნიშნული ცვლილების განხორციელება კი, საერთო სურათს უფრო დაამძიმებს, რადგან პენსიონერების უმრავლესობა გადამხდელუუნაროა, მათ ხშირად შვილები ეხმარებიან. გასპარინის აზრით, ფაქტობრივად, სახელმწიფო ოჯახებს აიძულებს, კანონის გვერდის ავლით იმოქმედონ.