იტალია - მომვლელმა მოხუცი მამაკაცი ქორწინების მიზნით გაიტაცა?!

შემთხვევა იტალიაში, რამდენიმე დღის წინ მოხდა. 47 წლის რუმინელმა მომვლელმა 94 წლის მამაკაცი, ჯანმრთელობის პრობლემებით, ქალაქ ვიარეჯოდან საკუთარი მანქანით გაიტაცა.

ისინი პოლიციამ ლა სპეციაში იპოვა. მანქანას ქალი მართავდა, ხოლო მოხუცი მამაკაცი, თავს ცუდად გრძნობდა. სასწრაფო დახმარების მანქანამ ის დაუყოვნებლივ საავადმყოფოში გადაიყვანა. 

მოგვიანებით პოლიციამ გაარკვია, რომ მამაკაცს შვილები ეძებდნენ, მათ პოლიციაში განცხადებაც ჰქონდა შეტანილი. ლა სპეციას პოლიციამ დაადგინა, რომ გამთენიისას "ბადანტემ" მამაკაცი ცეცხლმოკიდებული სახლიდან გაიყვანა, მანქანაში ჩასვა და გაურკვეველი მიმართულებით წაიყვანა. ჯერჯერობით დაუდგენელია ხანძრის გაჩენის მიზეზი. 

პოლიციამ მომვლელს მოხუცის საბუთებიც აღმოუჩინა გადამალული. სამართალდამცველების აზრით, ქალი მამაკაცზე დაქორწინებას აპირებდა, რის შემდეგაც ის დიდძალი ქონების პატრონი გახდებოდა, რადგან მამაკაცი საკმაოდ მდიდარი გახლდათ.

შვილებმა პოლიციასთან საუბრისას აღნიშნეს, რომ ეს პიროვნება მათ მამასთან 20 წლის განმავლობაში მუშაობდა, მაგრამ ბოლო დროს ძალიან შეიცვალა, აგრესიული გახდა, წინააღმდეგი იყო აცრისაც, როგორც თავისი, ასევე მოხუცის. 

რუმინელი "ბადანტე" ადამიანის გატაცების ბრალდებით დააკავეს და აღკვეთის ღონისძიების სახით, პატიმრობა შეუფარდეს.

აგრეთვე დაგაინტერესებთ:

📌 იტალიის გარკვეულ ნაწილში, ცენტრალური გათბობის სისტემას, დროზე ადრე გამორთავენ

📌 ფლორენციის ქართველ ემიგრანტთა საყურადღებოდ!

📌 რუსეთსა და უკრაინას შორის არსებული ომი იტალიელებს აშინებს - სად არის ბუნკერები იტალიაში