იტალია - რა ფულადი დახმარების მიღება შეგიძლიათ 2022 წელს

პანდემიით გამოწვეული და ახლა უკვე უკრაინის ომის გამო გართულებული ეკონომიკური მდგომარეობის გამო, რომელშიც იტალიაში მცხოვრები ოჯახები აღმოჩნდნენ, მთავრობამ შეიმუშავა რიგი სოციალური დახმარებების გეგმა, რომელიც შეეხება როგორც ოჯახებს და ახალგაზრდებს, ასევე იმ ადამიანებს, ვისაც ფსიქოლოგიური დახმარება სჭირდებათ. ფინანსური დახმარება წლიური შემოსავლის რაოდენობის მიხედვით განისაზღვრება.

• სოციალური დახმარება - იგულისხმება შეღავათები კომუნალური გადასახადების შემთხვევაში. ამ ტიპის დახმარებას იტალია ადრეც გასცემდა, მაგრამ ამჯერად მინიმალური ზღვარი, რომელიც პირმა ე.წ. ISEE-ში (ეკონომიკური მდგომარეობის ეკვივალენტური ინდიკატორი) უნდა დააფიქსიროს, წლიური 8000 ევროდან 12 000 ევრომდე აიწია. შესაბამისად, ამ დახმარებას 4 მილიონი ოჯახის ნაცვლად, 5.2 მილიონი ოჯახი მიიღებს. ცვლილება მოქმედებს 2022 წლის 1-ლი აპრილიდან 31 დეკემბრამდე.
• სოციალური დახმარება 2 - ამ დახმარების მისაღებად საჭირო არ არის განაცხადის წარდგენა, რადგან Arera INPS-ის (სოციალური დაცვის ეროვნული ინსტიტუტი) საშუალებით, ხედავს მონაცემებს და ავტომატურად განსაზღვრავს თანხას. სწორედ ამიტომ აუცილებელია ISEE-ს გაკეთება, რათა თანხა სწორად განისაზღვროს.
• შემდეგი დახმარება არის შვილის  შემწეობა, რომლის რაოდენობაც მშობლის შემოსავლების მიხედვით განისაზღვრება. დახმარების მისაღებად, შვილის ასაკად ადრე 18 წელი იყო დადგენილი, ახლა ეს ზღვარი 21 წლამდე გაიზარდა, თუ შვილი სწავლას აგრძელებს. თუ ISEE-ს არ წარადგენთ, თანხა ავტომატურად 50 ევროთი განისაზღვრება.
• შემწეობა ფსიქოლოგის ასაყვანად - ამ ტიპის დახმარებაც ISEE-ს მიხედვით განისაზღვრება და წელიწადში მაქსიმუმ 600 ევროს ანაზღაურებას გულისხმობს. 
• შესყიდვის ბარათი - ამ ტიპის ბარათი განკუთვნილი იქნება 3 წლის ქვემოთ, ან 65 წელს გადაცილებული პირებისთვის, რომელთა წლიური ISEE არ აღემატება 7 120 ევროს. ორ თვეში ერთხელ ბარათზე დაირიცხება 80 ევრო, რომლის დახარჯვაც შესაძლებელი იქნება იმ სუპერმარკეტებში, სადაც დაშვებული იქნება ამ ტიპის ბარათი.

აღნიშნული დახმარებების შესახებ დეტალური ინფორმაციისთვის გაეცანით INPS-ის ოფიციალურ გვერდს.