იტალიაში ხარ და სათანადო სამედიცინო მომსახურებას ვერ იღებ?! - გამოსავალი STP-ა

თუ იმყოფებით იტალიაში და გჭირდებათ სამედიცინო დახმარება, მაგრამ საბუთები ჯერჯერობით არ გაქვთ წესრიგში და შესაბამისად ვერ ახერხებთ აიღოთ იტალიური სამედიცინო ბარათი (Tessera sanitaria), თქვენი ემიგრანტული სტატუსის მიუხედავად, იტალიის სახელმწიფო გაძლევთ საშუალებას, ისარგებლოთ სამედიცინო მომსახურებით.

ქვეყნის კანონმდებლობის მიხედვით, შეგიძლიათ ისარგებლოთ პროგრამით STP (Stranieiri temporaneamente presenti), რომელიც გულისხმობს არალეგალი უცხოელის უფასო სამედიცინო მომსახურებას, გადაუდებელი სამედიცინო ჩარევის აუცილებლობის მიზნით.

STP ბარათის ხანგრძლივობა არის 6 თვე, მაგრამ შესაძლებელია მისი განახლება.

STP ბარათის აღების შემთხვევაში შესაძლებელია გადაუდებელი, ან აუცილებელი, არამხოლოდ ერთჯერადი, არამედ უწყვეტი სამედიცინო მომსახურება. ის ასევე გაძლევთ მონაწილეობის საშუალებას, ეროვნული ჯანდაცვის სისტემის SSN მიერ გათვალისწინებულ,პრევენციულ პროგრამებში, როგორებიცაა მაგალითად სკრინინგ პროგრამები, ვაქცინაცია და ა.შ. 

აღნიშნული საბუთის გაკეთება შესაძლებელია თითქმის ყველა ქალაქის გარკვეულ ადგილობრივ სამედიცინო ორგანოში - ASL. 

ამჯერად, მინდა კონკრეტული ინფორმაცია ფლორენციასა და მის შემოგარენში მცხოვრებ ქართველ ემიგრანტებს მივაწოდო. 

STP-ის გაკეთება შეგიძლიათ ფლორენციაში, შემდეგ მისამართზე: USL Toscana centro - Viale Morgagni 33R, სამშაბათს დილის 8.00-დან 12.30-მდე. 

სპეციალურად უცხოელი პაციენტებისთვის ექიმი მუშაობს სამშაბათს და ხუთშაბათს 14.00 საათიდან 17.00 საათამდე, მაგრამ მასთან ვიზიტზე, იგივე დღეებში, მაგრამ დილის საათებში უნდა ჩაეწეროთ. 

თუ ენობრივი ბარიერი გაქვთ, ხუთშაბათს 14.00 საათიდან 16.00 საათამდე დაგხვდებათ ქართული ენის თარჯიმანი, ამ შემთხვევაში მე და ვეცდები თქვენი და ექიმის კომუნიკაცია, მაქსიმალურად გასაგები გავხადო.

ჯანმრთელობას გისურვებთ!

ნინა მამუკაძე