იტალიელ ხელოვანზე, რომელმაც XVII საუკუნის საქართველოს რეალობა ნახატებში შემოგვინახა, დოკუმენტურ ფილმს გადაიღებენ

იტალიის ქალაქ პალერმოს ლეონარდო შაშას სახელობის მუნიციპალურ ბიბლიოთეკაში საინტერესო შეხვედრა გაიმართა, სადაც ქართული გადამღები ჯგუფი იმყოფებოდა ვიზიტით.

ქართული ჯგუფი დოკუმენტურ ფილმს ამზადებს ქრისტეფორე კასტელის, დიდი მისიონერისა და თეატინელი მამის ცხოვრებისა და შემოქმედების შესახებ, რომელმაც XVII საუკუნის საქართველოზე, საკუთარი კვალი დატოვა.

კასტელი იყო ექიმი და მათემატიკოსი, მაგრამ ისტორიას შემორჩა ასევე როგორც შესანიშნავი ხელოვანი. ხატავდა პორტრეტებს და საქართველოში ყოფნის დროს შექმნა შესანიშნავი ალბომი ადამიანების, ძეგლების და ცხოვრების წესის ამსახველი მომენტებისა.

ეს ნახატები იტალიაში ზღვით დაბრუნებისას, გემის ჩაძირვას შეეწირნენ, მაგრამ სამშობლოში დაბრუნებულმა მხატვარმა, ისინი ხელახლა დახატა და განმარტებებიც დაურთო.

კასტელი 1659 წელს გარდაიცვალა და სიცოცხლის ბოლომდე ხატავდა. მისი ნახატების 7 ალბომი, 1878 წელს ჯოაკინო დი მარცომ აღმოაჩინა და ახლა ისინი პალერმოს მუნიციპალურ ბიბლიოთეკაში ინახება.

შეხვედრას ესწრებოდნენ: ბიბლიოთეკის დირექტორი ელიანა კალანდრა, საქართველოს საპატიო კონსული ლეონარდა ამელია, ფრანჩესკო მარჯარაჩინა, თარჯიმანი თამარ ქირია, ჟურნალისტი თამარ მახარაძე, რეჟისორი ლევან მაჭარაშვილი, ოპერატორი ოთარ ბერძენიშვილი.