იტალიის პოლიციამ "მეპროცენტე" ქალი დააკავა

იტალიის ქალაქ ბარის პოლიციამ, მევახშეობის ბრალდებით, 56 წლის ქალი დააკავა, რომელიც თანხას, დიდი პროცენტის სანაცვლოდ, განსაკუთრებულად გაჭირვებულ ოჯახებს აძლევდა. მის წინააღმდეგ საჩივარი პოლიციაში ქალის ერთ-ერთი "კლიენტისგან", ასაკოვანი ქალბატონისგან შევიდა, რომელსაც "მეპროცენტემ" 2021 წლის ივლისში 3000 ევრო ასესხა. საწყისი თანხა სულ რაღაც რამდენიმე თვეში, 9000 ევრომდე გაიზარდა, რომლის გარკვეული ნაწილიც მევალეს პარასკევს, 21 იანვარს უნდა ჩაებარებინა. 

მევალისგან გაფრთხილებულმა პოლიციამ, ეჭვმიტანილი სწორედ ფულის გადაცემის მომენტში, ფაქტზე აიყვანა. პოლიცია ქალს გასული წლის დეკემბრის პირველი რიცხვებიდან უთვალთვალებდა და შესაბამის მომენტს ელოდა. დაპატიმრების შემდეგ, სამართალდამცველებმა აღნიშნული პირის ბინის ჩხრეკა აწარმოვეს და გარდა ფულადი თანხისა, მევახშეობის დამადასტურებელი დოკუმენტაცია, მევალეების სია და არაერთი საბანკო და საკრედიტო ბარათი ამოიღეს, რომელთა შორის იყო, სოციალური დახმარების მიმღები პირების ბარათებიც.

ბოლო ფაქტმა პოლიციის განსაკუთრებული ყურადღება მიიქცია, რადგან ეს შეიძლება იყოს სამხილი იმის დასამტკიცებლად, რომ ქალი უკიდურესად გაჭირვებული ოჯახებისგან გარანტიის სახით იბარებდა აღნიშნულ ბარათებს, რომელიც ამ ადამიანებისთვის სასიცოცხლოდ მნიშვნელოვანი შეიძლებოდა ყოფილიყო.