"ლეგენდარული იტალიური ჯგუფი RICCHI E POVERI საქართველოში კონცერტს გამართავს" - საქველმოქმედო ფონდი "ცხოვრება მშვენიერია"

ლეგენდარული იტალიური ჯგუფი "RICCHI E POVERI" საქველმოქმედო ღონისძიების ფარგლებში 11 და 12 ნოემბერს საქართველოს ეწვევა. ამის შესახებ ჯგუფის წევრები ვიდეო მიმართვასაც ავრცელებენ და თაყვანისმცემლებს, მუსიკის მოყვარულებსა და უბრალოდ კეთილ ადამიანებს, კონცერტზე ეპატიჟებიან. კეთილ ადამიანებს ხაზი გავუსვით, რადგან როგორც აღვნიშნეთ, ღონისძიება საქველმოქმედო ხასიათს ატარებს.

პროექტის ინიციატორი და სულისჩამდგმელი, საქველმოქმედო ფონდი "ცხოვრება მშვენიერია" და მისი დამფუძნებელი ნიკა ესაკიაა. კონცერტიდან შემოსული თანხა ბერი ანდრიას ფონდის შვილობილების - ავთვისებიანი სიმსივნით დაავადებული ბავშვების დასახმარებლად არის გამიზნული.

როგორც ფონდის დამფუძნებელი ნიკო ესაკია აღნიშნავს - "ყველაფერი ოცნებით იწყება, მერე  ოცნება ან ახდება, ან არა. ამჯერად კი, საქველმოქმედო ფონდ ,,ცხოვრება მშვენიერია"-ს არსებობის ისტორიაში მეორე სასწაული ახდა. დიახ, ეს არც უბრალო სიტყვებია და  არც მონაგონი ისტორია. 11 და 12  ნოემბერს, ჩვენი ფონდის 10 წლის იუბილესთან დაკავშირებით, სასტუმრო ,,ბილტმორში"  და  თბილისის სპორტის სასახლეში, საქველმოქმედო ფონდი ,,ცხოვრება მშვენიერია" წარმოგიდგენთ საქველმოქმედო კონცერტს, ლეგენდარული ჯგუფის ,,RICCHI E  POVERI"-ის მონაწილეობით".

"RICCHI E POVERI" კონცერტს, ზუკა ხუციშვილის ბენდთან და ქართული ესტრადის ვარსკვლავებთან ერთად 12 ნოემბერს, 20:00 საათზე, თბილისის სპორტის სასახლეში გამართავს.

ბილეთების შეძენა შეგიძლიათ ბმულზე: tkt.ge/ricchiepoveri