მაფიოზების “ვენდეტა” ნეაპოლში - მოკლულია “კამორას” ორი წევრი

იტალიური პრესის ინფორმაციით, გუშინ, იტალიის ქალაქ ნეაპოლში მომხდარი ორმაგი მკვლელობა, "კამორას" ორ დაპირისპირებულ დაჯგუფებას უკავშირდება.

ნეაპოლის ერთ-ერთ პერიფერიაში, გუშინ 45 წლის პასქუალე ტორე და 35 წლის ჯუზეპე დი ნაპოლი, მანქანაში ჩაცხრილეს. როგორც ირკვევა, ქილერები გზაზე მოძრავ მანქანას "სკუტერით" წამოეწივნენ.

ტორე მანქანაშივე გარდაიცვალა, დი ნაპოლიმ გაქცევა სცადა, მაგრამ მკვლელები დაეწივნენ და დაწყებული საქმე ბოლომდე მიიყვანეს. 

გამოძიებამ დაადგინა, რომ პასქუალე ტორე, მარიანო ტორეს ძმაა, რომელიც სამართალდამცველებთან თანამშრომლობდა და რომელიც დაკავშირებულია ლო რუსოს კლანთან. ამ თანამშრომლობამ ნათელი მოჰფინა 17 წლის ჯენი ჩეზარანოს 2015 წელს განხორციელებულ მკვლელობას. ახალგაზრდა გარდაიცვალა ლო რუსოს (შემდეგ პოლიციასთან თანამშრომლობდა) დაკვეთილი "ოპერაციისას", რომელსაც მაფიის ბოსის, ესპოზიტოს მკვლელობა ჰქონდა ნაბრძანები.

თუმცა, პოლიცია სხვა მოტივებსაც განიხილავს, რადგან პასქუალე და მარიანო ანტონიო ტორეს შვილები არიან, რომელიც ანა ტორეს ძმაა, ანა ტორე კი ლო რუსოს მეუღლეა. ანუ მოკლული პასქუალე ტორე ლო რუსოს ცოლის ძმისშვილი გამოდის.

პოლიცია არ გამორიცხავს, რომ აღნიშნული მკვლელობა, სხვა მკვლელობას უკავშირდებოდეს. საუბარია ადგილობრივი დაჯგუფების წევრზე, რომელიც გასული წლის ნოემბერში მოკლეს. 

აღნიშნული მკვლელობა, თავის დროზე,  შეფასებულ იქნა როგორც განხეთქილების ვაშლი "კამორისტების" დაჯგუფებებს შორის.