მილანი იტალიის ჩემპიონია - გამარჯვების აღნიშვნის დროს მილანის მწვრთნელს კისრიდან მედალი მოჰპარეს

სერია ა-ს 38-ე ტურში, მილანი-სასუოლოს თამაში რეჯიო-ემილიას "მაპეის სტადიონზე" შედგა. 11 წლიანი პაუზის შემდეგ, მილანი იტალიის ჩემპიონი გახდა. ანგარიში მილანის სასარგებლოდ 3-0 დასრულდა. 

ჩემპიონატის აღნიშვნის დროს, ,,როსონერის" მთავარ მწვრთნელს, სტეფანო პიოლის კისრიდან საჩემპიონო მედალი მოჰპარეს.  
,,მედალი დავკარგე, ვიღაცამ კისრიდან ჩამომგლიჯა. თუ საშუალება მაქვს რომ მივმართო, გამიხარდება თუ დამიბრუნებენ, რადგან ეს ერთადერთია, რაც მაქვს," - განაცხადა პიოლიმ მედიასთან საუბრისას.

24 საათზე ნაკლები დრო დასჭირდა რეჯიო-ემილიას პოლიციას იმისათვის, რომ ,,როსონერის" მთავარი მწვრთნელის, სტეფანო პიოლის საჩემპიონო მედალი ეპოვა. ცოტა  ხნის წინ პოლიციელებმა პიოლს საჩემპიონო მედალი უკან დაუბრუნეს.

რეჯიო-ემილიას პოლიციაში მედლით ხელში, დღეს სამი ახალგაზრდა ადვოკატთან ერთად გამოცხადდა. ახალგაზრდების თქმით, მედალი გასახდელთან ახლოს, გაზონთან იპოვეს. მათი ადვოკატის განცხადებით კი, ახალგაზრდებმა მედალის პოვნის შესახებ მანამდე განაცხადეს ინსტაგრამის მეშვეობით, ვიდრე პიოლი ამის შესახებ მიმართვას გაავრცელებდა.

"როგორც კი გაიგეს, რომ მედალი პიოლის ეკუთვნოდა გადაწყვიტეს უკან დაბრუნება," - განაცხადა ახალგაზრდების ადვოკატმა. საქმეზე გამოძიება კვლავ მსვლელობაშია.

ნონა გედენიძე სპეციალურად ExclusiveTV-თვის რეჯო-ემილიადან