„მირეკავს მოხუცი ადამიანები, რომლებიც ტირიან და შველას ითხოვენ, გაუსაძლის პირობებში მუშაობის გამო“ - გივი გელაშვილი

იტალიაში მცხოვრების ემიგრანტი, პოლიტიკური მეცნიერების და საერთაშორისო ურთიერთობების სტუდენტი, ფეხბურთელი და იტალიური ენის ონლაინ და ქართულის კურსის ონლაინ გაკვეთილების ავტორი, გივი გელაშვილი სოციალურ ქსელში მორიგ წერილს აქვეყნებს, სადაც ემიგრანტების მძიმე ყოფაზე ამახვილებს ყურადღებას.

„მაქსიმალურად გულწრფელი და პირდაპირი ვიქნები. იტალიაში ემიგრანტების მდგომარეობა არის საშინლად ცუდი. სანამ საბუთების საკითხს ასე სისტემატურად შევეხებოდი, კიდევ ვერ წარმომედგინა ამას რა მოჰყვებოდა. დღეში 30 ზარი შემოდის და ამათგან, 25 იმასთან დაკავშირებით, რომ ემიგრანტის უფლებები ირღვევა ან კიდევ უარესი, მათზე დამსაქმებლები ფულს აკეთებენ.

მირეკავს მოხუცებული ხალხი, რომლებიც ტირიან და შველას ითხოვენ გაუსაძლის პირობებში მუშაობის გამო.
ადამიანები, რომლებიც არიან ტერორში იმის გამო, რომ წასასვლელი არ აქვთ სამსახურის დაკარგვის შემთხვევაში ან კიდევ უფრო უარესი სადაც ჰქონდათ წასასვლელი გამოაგდეს რადგან თვიურად ვერ იხდიდნენ (ანუ როდესაც სადმე ბინაში ქართველთან ცხოვრობ და მერე გადიხარ გინდ 5 დღე ყოფილიყავი მასთან მერე იხდი ეგრეთ წოდებულ ''სტავკას'' 30 ან 50 ევროს თვეში, იმის მიუხედავად მიდიხარ თუ არა ამ სახლში).

წეღან 70 წლის ქალი მეუბნება დღეში 12 საათს მამუშავებენ, როდესაც ცუდად ვხდები თავს ძალას ვატან, რომ არ გამაგდონ სახლიდან.... იმის მიუხედავად, რომ ნახევარს უხდიან იქიდან რაც სინამდვილეში ეკუთვნის (საბუთიანია).

შუახნის ქალი მეუბნება სამსახურში შევედი, 800 ევროს მიხდიან ხელფასს და ეგერთ წოდებულ დამსაქმებელს, 900 გადავუხადე შესვლისას.

ასევე მირეკავს ქალი და მეუბნება „ტესერა“ (ჯანმრთელობის დაზღვევის ბარათი) გამიკეთა ვიღაცა ქართველმა და 500 ევრო გამომართვა.

ემიგრანტების 80% იტალიაში არის გაუთვითცნობიერებელი თუ როგორ დაიცვას თავი ასეთ სიტუაციაში და 90% -მა არ იცის როგორ დაიცვას თავი ისევ თავისი თანამემამულისგან.

ზოგიერთი ქართველი, აი ის ქართველები „აჯენციას“ (დასაქმების ბიურო), რომ უსაბუთო ქართველებს „უზიდავენ“ ასეთ შეთანხმებას დებენ: თვის ბოლოს ხელფასს, რომელსაც გამოიმუშავებს ადამიანი, იმის მიუხედავად, რომ საბუთი არ აქვს, ოჯახი ამ ფულს აძლევს სააგენტოს და სააგენტო აძლევს შემდეგ დასაქმებულს.

ისმის კითხვა რატომ? იმიტომ, რომ შუამავლობის თანხა იყოფა......

მე გულწრფელად გეტყვით, უკვე გულის შიგნით რაღაც მღრნის ამ ყველაფრის მოსმენისას და ძალიან მტკივა.
სადამდე დავედით.... არ ვიცი სად ვეძიო გამოსავალი და როგორ მოვიქცე. კიდევ ბევრს ვერ გპასუხობთ ერთი ადამიანი ვარ, მაგრამ ეს ყველაფერი ასე არ უნდა დარჩეს ამდენი ადამიანი ასე არ უნდა იტანჯებოდეს.....

თუ ვინმემ დაგიშავათ რაიმე და გაქვთ ფაქტები დაწერეთ კომენტარებში და ერთად გავაცნოთ მათი საქმეები მთელ საქართველოს.“ - წერს გივი გელაშვილი

აგრეთვე დაგაინტერესებთ:

📌 თაღლითობა კიბოთი დაავადებული ბავშვების სახელით

📌 გამოვიყენოთ თუ არა გასულ წელს გამოყენებული, ან ვადაგასული დამცავი? - რჩევები სპეციალისტისგან

📌 გაქვთ თუ არა Tessera sanitaria-ს აღების და სამედიცინო მომსახურების მიღების უფლება, თუ იტალიაში ტურისტულად შემოხვედით?!