ქართველმა ბანმა იტალიაში კლასიკური მუსიკის კონკურსში გაიმარჯვა

ქართველმა ბანმა გიორგი მანოშვილმა, იტალიის ქალაქ მოდენაში 9 იანვარს, ნიკოლაი გიაუროვის სახელობის კონკურსში გაიმარჯვა. თუ რამდენად მნიშვნელოვანი და საამაყოა საოპერო სამყაროში ასეთ კონკურსში გამარჯვება, კლასიკური მუსიკის მოყვარულთათვის ბევრი ახსნა საჭირო არ არის, მაგრამ სანამ საკუთარ შემოქმედებას ოპერას დაუკავშირებდა, ახალგაზრდა მომღერალმა დიდი გზა განვლო. ExclusiveTV.ge მომღერალს რომში დაუკავშირდა.

- გიორგი, როგორც ვიცით ანსამბლ "რუსთავში" მღეროდი, როგორ აღმოჩნდი საოპერო სამყაროში?

- დავამთავრე გიორგი მთაწმინდელის სახელობის გალობისა და სიმღერის უმაღლესი სასწავლებელი. საქართველოს სიმღერისა და ცეკვის სახელმწიფო აკადემიურ ანსამბლ "რუსთავში" ბოლო 10 წლის განმავლობაში ვმღეროდი. შემადგენლობაში მოვიარე ფაქტობრივად მთელი მსოფლიო და ჩავატარე არაერთი კონცერტი. ასევე ვგალობდი მგალობელთა გუნდ "ტაო"-ში.

ორი წლის წინ, საბოლოოდ გადავწყვიტე, გავმხდარიყავი ოპერის მომღერალი და ჩავაბარე თბილისის ვანო სარაჯიშვილის სახელობის კონსერვატორიაში, მაგისტრატურის ფაკულტეტზე, მაესტრო ელდარ გეწაძის კლასში. შარშან მონაწილეობა მივიღე ქალაქ პეზაროში "Rossini opera festival"-ში, სადაც გავიარე აკადემია "Accademia Rossinians Alberto Zedda"-ს ფარგლებში.

- რაც შეეხება კონკურსს?

- მოდენაში ჩატარდა ნიკოლაი გიაუროვის სახელობის კონკურსი. ნიკოლაი გიაუროვი საოპერო სამყაროში ერთ-ერთი საუკეთესო ბანი მომღერალი იყო და ჩემთვისაც ასევე ბანისთვის ძალიან სასიამოვნო და სიმბოლური იყო ამ კონკურსში მონაწილეობა და მით უმეტეს გამარჯვება.

პანდემიიდან გამოწვეული სირთულეების გამო, პირველი 2 ტური ონლაინ ჩატარდა, სადაც შეირჩა 15 ფინალისტი. ფინალი ქალაქ მოდენას "Teatro san Carlo"-ში გაიმართა, სადაც ვიმღერე ატილას არია და სტრეტა "Mentre gonfiarsi l'anima" ოპერიდან "Attila". ჟიურის თავმჯდომარე იყო ცნობილი იტალიელი მომღერალი, აგრეთვე ბანი Roberto Scandiuzzi.

-სამომავლო გეგმები ისევ იტალიას უკავშირდება?

- მეტ წილად ასეა, მაგრამ არა მხოლოდ... თებერვალში ვიმღერებ რომის ოპერის თეატრში ჯაკომო პუჩინის "le Boheme"-ში, ხოლო მარტში ბულგარეთში ქალაქ Russe-ში, ჯუზეპე ვერდის "Ernani"-ში. ზაფხულში ისევ იტალიაში დავბრუნდები და უკვე მეორედ მონაწილეობას მივიღებ "Rossini opera festival"-ში და შემოდგომაზე ირლანდიაში გავემგზავრები,  "Wexford Festival"ში მონაწილეობის მისაღებად.

ნინა მამუკაძე სპეციალურად ExclusiveTV.ge-სთვის ფლორენციიდან