რა სხვაობაა, ომის და პანდემიის მოტივით გამოცხადებულ საგანგებო მდგომარეობებს შორის - იტალია

დღეს, მაშინ როდესაც იტალიაში ერთ თვეში საგანგებო მდგომარეობა უნდა გაუქმებულიყო, ქვეყნის პრემიერმა გააკეთა განცხადება საგანგებო მდგომარეობის გახანგრძლივებაზე 2022 წლის 31 დეკემბრამდე, მხოლოდ მოტივად რუსეთ-უკრაინის ომი დაასახელა.

ვნახოთ, რა სხვაობაა, ომის და პანდემიის მოტივით გამოცხადებულ საგანგებო მდგომარეობებს შორის.

საგანგებო მდგომარეობა პანდემიის გამო

ის გამოიყენება ბიუროკრატიული პროცედურების დასაჩქარებლად ვირუსთან ეფექტურად გამკლავებისთვის. იძლევა გარანტიას რომ ახალი განკარგულებები (მაგალითად, რეგიონების ფერის შეცვლა, ან ვაქცინაციის კამპანიის წარმოება) და დეკრეტები (სხვადასხვა შეზღუდვების დაწესება) მაქსიმალურად სწრაფად შევიდეს ძალაში და განხორციელდეს ეფექტურად.

პანდემიის გამო საგანგებო მდგომარეობის დროს ქვეყანაში ფუნქციონირებს ტექნიკურ-სამეცნიერო კომიტეტი და კომისრის უწყება, რომელიც კონსულტაციებს უტარებს ხელისუფლებას და სიტუაციას კოორდინირებას უწევს. ასევე, კომისრის ინსტიტუტის უფლება-მოვალეობებში შედის ვაქცინაციის კამპანია, დოზების განაწილება და ადმინისტრირება ჰაბებში, აფთიაქებსა და სამედიცინო დაწესებულებებში.

საგანგებო მდგომარეობა ომის გამო

რაც შეეხება მეორე ტიპის საგანგებო მდგომარეობას, ამ ეტაპზე, მოტივად უკრაინის ომი დასახელდა და ძირითად ეხება უკრაინაში დახმარების გაგზავნას და ნატოს აღმოსავლეთ ფრონტის გაძლიერებას. იტალიის მთავრობამ სპეციალური დადგენილების საშუალებით უკვე გასცა უკრაინის სამხედრო დახმარების შესახებ განკარგულება.

გარდა ამისა, მზადყოფნაში მოვიდა საგარეო საქმეთა სამინისტროს კრიზისების განყოფილება, რათა საჭიროების შემთხვევაში მაქსიმალურად სწრაფად დაეხმარონ საზღვარგარეთ მყოფ იტალიელებს და ასევე მზადყოფნაშია სამოქალაქო დაცვის სექტორი, იმ შემთხვევისთვის, თუ უკრაინაში იმაზე მეტად დრამატული ჰუმანიტარული მდგომარეობა წარმოიშობა, ვიდრე მოცემულ მომენტშია.