როგორ შეგიძლიათ მიიღოთ ევროკავშირის მუდმივი ბინადრობის ნებართვა იგივე il permesso di soggiorno illimitato UE

ევროკავშირის მუდმივი ბინადრობის ნებართვის (Il permesso di soggiorno illimitato UE) მოთხოვნა შეუძლია უცხოელ მოქალაქეს, რომელსაც, იტალიაში სულ მცირე 5 წლიანი რეგულარული ცხოვრების დამადასტურებელი დოკუმენტი აქვს.

ევროკავშირის მუდმივი ბინადრობის ნებართვას (Il permesso di soggiorno illimitato UE) მოქმედების დრო არ ეწურება და არ საჭიროებს განახლებას. მხოლოდ ახალი მონაცემებით ჩასწორდება, მაგალითად თუ საცხოვრებელი ადგილი შეიცვალეთ, ან ფოტოს შეცვლა გსურთ და ა.შ. ბინადრობის ჩვეულებრივ ნებართვასთან შედარებით კი უცხოელს ანიჭებს დამატებით უფლებებს.

ევროკავშირის მუდმივი ბინადრობის ნებართვის მისაღებად, აუცილებელია დამადასტურებელი საბუთი, რომ თქვენი შემოსავალი არ არის სოციალური დახმარების წლიურ ოდენობაზე ნაკლები ნებისმიერი ტიპის ხელშეკრულების დროს.

მაგალითად, 2022 წლისთვის თქვენი წლიური შემოსავალი უნდა იყოს მინიმუმ 6.079,45 €, თვეში 467,65 €-ს ოდენობით, რომ შეძლოთ განაცხადის გაკეთება. თუ განაცხადს 2022 წელს აკეთებთ, მაშინ 2021 წლის შემოსავლების ცნობა დაგვჭირდება, თუ 2023 წელს გიწევთ განაცხადის გაკეთება, მაშინ მნიშვნელოვანია წარადგინოთ 2022 წლის საშემოსავლო ცნობა. აუცილებელია გქონდეთ ნასამართლობის შესახებ ცნობა, რომლის გაკეთებაც ელექტრონულადაც არის შესაძლებელი. ასევე დაგჭირდებათ იტალიურ ენაში ჩაბარებული გამოცდის A2 საფეხურის ცნობა.

იტალიური ენის ცოდნის შესამოწმებელი ტესტის ჩასაბარებლად, განაცხადი უნდა შეიტანოთ პრეფექტურაში, სადაც თქვენი მონაცემები შემოწმდება. განაცხადის გაკეთებიდან 60 დღის განმავლობაში კი გეცოდინებათ გამოცდის ჩატარების დღე, დრო და ადგილი. გამოცდა ტარდება კომპიუტერული მეთოდების გამოყენებით, ტესტის სახით. გამოცდაზე ჩაჭრის შემთხვევაში ხელმეორედ გასვლის უფლება მოგეცემათ 90 დღის გასვლის შემდეგ.

გამოცდის ჩატარების ადგილს არჩევს იმიგრაციის ტერიტორიული საბჭო, ადგილობრივ ხელისუფლებასა და საგანმანათლებლო დაწესებულებებთან შეთანხმებით. გამოცდის ჩასაბარებლად კანდიდატის მიერ მიღებული ქულების ჯამი 80%-ს მაინც უნდა შეადგენდეს. გამოცდის შედეგების ნახვა შეგეძლებათ ვებგვერდზე www.testitaliano.interno.it

იტალიურ ენაში გამოცდის ჩაბარება არ მოეთხოვება, მათ ვინც არის საერთაშორისო დაცვის ქვეშ მყოფი პირი და ითხოვს გრძელვადიანი ბინადრობის ნებართვის მიღებას. ევროკავშირის მუდმივი ბინადრობის ნებართვის მისაღებად გასათვალისწინებელია ქვეყნის ტერიტორიაზე ყოფნის ხანგრძლივობა (მინიმუმ 5 წელი რეგულარულად) და ასევე საზოგადოებრივი, სოციალური, ოჯახური, შრომითი ინტეგრაცია.

ევროკავშირის მუდმივი ბინადრობის ნებართვა შეიძლება გაუქმდეს ან ჩამოერთვას თუ უცხო ქვეყნის მოქალაქემ თაღლითურად მოიპოვა ის ან რისკებს ქმნის სახელმწიფო უსაფრთხოებისთვის, ასევე თუ 12 თვის განმავლობაში არ იმყოფება ევროკავშირის ტერიტორიაზე. ქვეყნის ტერიტორიაზე ხანგრძლივად არყოფნის ან ევროკავშირის ბინადრობის ნებართვის სხვა წევრი ქვეყნების მიერ გაცემის შემთხვევაში, შესაძლებელია ამ ნებართვის ხელახლა მიღება 3 წლის შემდეგ.

ხშირად უცხო ქვეყნის მოქალაქეებს უჭირთ ზუსტი თარიღის გარკვევა რეგულარულად ცხოვრების დაწყებიდან როდის გადის ხუთი წელი. უმჯობესია, თქვენს მუნიციპალიტეტში არსებულ ქვესტურას მიმართოთ, დაურეკოთ. ისინი თქვენი ახლანდელი ბინადრობის დამადასტურებელი დოკუმენტის მონაცემების მიხედვით ზუსტად გეტყვიან თარიღს, როდის შეგეძლებათ ევროკავშირის მუდმივი ბინადრობის ნებართვის მისაღებად მოთხოვნა გააკეთოთ. განაცხადის გაკეთებამდე კი ყველა ზემოთ ჩამოთვლილი დოკუმენტი მზად უნდა გქონდეთ. განაცხადის გაკეთება შეგიძლიათ ფოსტაში სპეციალური საფოსტო ნაკრების (Kit postale) გამოყენებით ყვითელი ზოლის კონვერტში - მოთხოვნა გაცემის/განახლებისთვის. სანებართვო / ბინადრობის მუდმივი ბარათი უცხოელი მოქალაქეებისთვის, ხელმისაწვდომია "sportelloamico" ყველა საფოსტო ოფისში.

ნონა გედენიძე, სპეციალურად exclusivetv.ge-სთვის რეჯო-ემილიადან

სხვა სიახლეები:

📌 იტალიის ჩრდილოეთ რეგიონებში მცხოვრებ საქართველოს მოქალაქეთა საყურადღებოდ!

📌 იტალიის პრემიერ მინისტრმა კოვიდი დაამარცხა და Palazzo Chigi-ში დაბრუნდა

📌 „პატივი ეცით დედამთილს“ - რომის პაპის მოწოდება