რომის პაპმა 16 ჩვილი მონათლა

რომის პაპმა ფრანცისკემ სიქსტეს კაპელაში 16 ჩვილი მონათლა. შვიდი ბიჭი და ცხრა გოგონა ვატიკანის თანამშრომლების შვილები, ან ნათესავები არიან.

გასულ წელს, პანდემიის გამო შეჩერებული იყო ნათლობის რიტუალი ვატიკანში. ბოლოს 2020 წლის 12 იანვარს 32 ბავშვი მოინათლა. პატარები რომ არ დაღლილიყვნენ რომის პაპი ფრანცისკე მაშინ მოკლე ქადაგებით შემოიფარგლა.

ვატიკანში თანამშრომლების შვილების თუ ახლობლების ნათლობის ჩვეულება 1981 წლის 11 იანვრიდან მომდინარეობს, რომლის დაარსებაც რომის პაპ იოანე პავლე მეორეს სახელს უკავშირდება. 1983 წელს რომის პაპი იოანე პავლე მეორე პირველად წარუძღვა წირვას სიქსტეს კაპელაში ბავშვების ნათლობის რიტუალთან ერთად.

,,ბავშვებმა იტირონ, იყვირონ, თუ ერთი დაიწყებს სხვებიც აჰყვებიან და ორკესტრიც დაკომპლექტდება. თუ შიათ ძუძუთი გამოკვებეთ"- მიმართა მშობლებს რომის პაპმა დღევანდელი ქადაგებისას.

,,ბავშვები აქ არიან ღვთის ძალის საძიებლად, ქრისტიანული იდენტობის მისაღებად,"-განაგრძო მან და კვლავ მიმართა მშობლებს ,,თქვენ უნდა დაიცვათ თქვენი შვილების ქრისტიანული იდენტობა. ეს ყოველდღიური საქმეა, ეს არის დღის გზავნილი - ქრისტიანული იდენტობის დაცვა."

ნონა გედენიძე სპეციალურად ExclusiveTV.ge-სთვის ემილია-რომანიადან