რომის პაპმა ერთნაირსქესიანი წყვილების ქორწინების დალოცვა დაუშვა

რომის პაპმა ფრანცისკემ მღვდლებს უფლება მისცა დალოცონ ერთსქესიანი წყვილები, რაც მნიშვნელოვანი წინსვლაა ლგბტ ადამიანებისთვის რომის კათოლიკურ ეკლესიაში.

კათოლიკური ეკლესიის ლიდერმა თქვა, რომ ერთნაირსქესიანთა ქორწინება გარკვეულ პირობებში დაშვებული იქნება, თუმცა ვატიკანმა განმარტა, რომ დალოცვა არ უნდა იყოს ეკლესიის ჩვეული რიტუალების ნაწილი ან დაკავშირებული სამოქალაქო ქორწინებებთან.

რომის პაპმა ასევე დასძინა, რომ ქორწინებას კვლავ განიხილავს ქალსა და კაცს შორის.

რომის პაპმა ფრანცისკემ ვატიკანის მიერ გაცემული დოკუმენტი დღეს, 18 დეკემბერს დაამტკიცა. 

კარდინალმა ვიქტორ მანუელ ფერნანდესმა განაცხადა, რომ ახალი დეკლარაცია ერთგული რჩება ეკლესიის ტრადიციული დოქტრინისა ქორწინების შესახებ, თუმცა ახალი მითითებები მღვდლებს საშუალებას მისცემს, დალოცონ ურთიერთობები, რომლებიც ჯერ კიდევ “ცოდვად” არის მიჩნეული.

კარდინალმა ფერნანდესმა ხაზგასმით აღნიშნა, რომ ახალი პოზიცია კათოლიკური ეკლესიის თვალში არ ადასტურებს ერთსქესიანი წყვილების სტატუსს.

დეკლარაცია წარმოადგენს კათოლიკური ეკლესიის ტონის შერბილებას, თუმცა არა პოზიციის ცვლილებას. 2021 წელს რომის პაპმა თქვა, რომ მღვდლები ვერ აკურთხებენ ერთსქესიანთა ქორწინებას, რადგან ღმერთს არ შეუძლია "აკურთხოს ცოდვა".

ზოგიერთ ქვეყანაში ეპისკოპოსები ადრე ნებას რთავდნენ მღვდლებს ერთსქესიან წყვილთა დალოცვას, თუმცა ეკლესიის პოზიცია გაურკვეველი რჩებოდა.