რომის ქართული სამრევლოს საკვირაო სკოლა, მოსწავლეთა მიღებას აცხადებს

"მოხარული ვართ გაცნობოთ... რომის სამრევლოს საკვირაო სკოლაში სწავლა განახლდება 2022 წლის 2 ოქტომბერს. განახლებული სკოლის ფართით, სწავლის პროგრამებით და საინტერესო პროექტებით.  სკოლა აცხადებს მიღებას 5-დან 14 წლამდე ასაკობრივი ჯგუფის მოსწავლეებისთვის", - ამ ინფორმაციას ანდრია პირველწოდებულის სახელობის რომის ქართული სამრევლოს წინამძღვარი, არქიმანდრიტი იოანე (ხელაია) ავრცელებს.

თითქმის 10 წელია იტალიის დედაქალაქ რომში, წმინდა ანდრია პირველწოდებულის სახელობის ტაძარში, წირვა-ლოცვა ქართულ ენაზე აღევლინება. სამრევლოს წინამძღვარი სწორედ მამა იოანე (ხელაია) გახლავთ. 2021 წლის 18 ივნისს, წმიდა საყდრის გადაწყვეტილებით, საქართველოს ეკლესიის დასავლეთ ევროპის ეპარქიას, გრძელვადიან სარგებლობაში გადაეცა რომში, Via Della Madonna Dei Monti 39-ში მდებარე ეკლესია.

უკვე ხუთი წელია ფუნქციონირებს რომის სამრევლოსთან არსებული საკვირაო სკოლა "ფესვები", რომელიც პირველი ქართული საგანმანათლებლო დაწესებულებაა არა მარტო რომში, არამედ მთელ ლაციოს რეგიონში. ქართველი პედაგოგები ძალისხმევას არ იშურებენ, რომ რომში მცხოვრებმა პატარა ქართველებმა არ დაივიწყონ მშობლიური ენა, შეისწავლონ ისტორია და კულტურა, სიმღერა და ცეკვა.

დღესდღეობით სკოლაში ოცი მოსწავლეა დარეგისტრირებული. სწავლება უფასოა. საკვირაო სკოლის მიზანი, სწავლებასთან ერთად, ისიც არის, რომ ქართველ ბავშვებს ურთიერთობა ჰქონდეთ მათივე ასაკისა და ინტერესების მქონე ქართულენოვან თანატოლებთან.

ქართული ენის შესწავლა ხდება თანამედროვე მეთოდოლოგიით თანამედროვე ქართველი საბავშვო მწერლების მოწვევა; ისტორიის, კულტურისა და ტრადიციების გასაცნობად სადღესასწაულოდ ღონისძიებების მოწყობა, ქართული ფილმების ჩვენება; ქორეოგრაფიული ჯგუფის მუშაობა; ქართული მუსიკის გაკვეთილების ჩატარება პროფესიონალის ხელმძღვანელობით. სკოლის უმთავრესი მიზანია ახალგაზრდებისათვის ქართული სივრცის შექმნა, სადაც თანატოლებთან კომუნიკაციის საშუალება მიეცემათ. რაც შეიძლება მეტ ქართველ ბავშვს და მოზარდს გაუჩნდეს სურვილი, უკეთ გაიცნოს თავისი ქვეყანა და ისწავლოს როგორც ქართული ენა, ასევე საქართველოს ისტორია და გაეცნოს ქართულ კულტურას.

დაინტერესების შემთხვევაში დაუკავშირდით სკოლის ხელმძღვანელს ნენო გაბელიას, ნომერზე: 3888142280

დოდუკა ბრატულიჩი სპეციალურად ExclusiveTV-თვის რომიდან