თავშესაფრის მოთხოვნა იტალიაში - პასუხი ყველა კითხვაზე (VIDEO)

ExclusiveTV-მ გასულ კვირას დაიწყო ახალი პროექტი “მედია გზამკვლევი” - საემიგრაციო საკითხებში (იტალია)

ეს იქნება გადაცემების ციკლი, რომელიც სოციალურ ქსელ "ფეისბუქზე" პირდაპირი ჩართვის რეჟიმში გავა და სადაც დეტალურად იქნება განხილული ის თემები, რომელიც იტალიაში ემიგრაციას, მასთან დაკავშირებულ პროცედურებს, ბიუროკრატიას და ამ გზაზე შემხვედრი სირთულეებიდან გამოსვლის გზების გაცნობას შეეხება.

წამყვანი: ჟურნალისტი ნინა მამუკაძე (ფლორენცია).

სტუმარი და თანაწამყვანი: მედიატორი და თარჯიმანი  მაკა ხაჩოშვილი (ნეაპოლი).

პირველი გადაცემის თემა, რომელიც 18 მარტს გავიდა პირდაპირ ეთერში, გახლდათ თავშესაფრის მოთხოვნა იტალიაში - Richiesta di asilo in Italia.

გადაცემის დასრულების შემდეგ, კომენტარებში დაისვა კითხვები, ჩვენ ვეცადეთ ამომწურავი პასუხები გაგვეცა ამ დამატებით კითხვებზეც, რომლებსაც გადაცემის ვიდეოსთან ერთად გთავაზობთ. კითხვებს კვლავ მაკა ხაჩოშვილი პასუხობს:

- აუცილებელია თუ არა, განმცხადებელს ჰქონდეს იტალიურ ენაზე ნათარგმნი ისტორია?

- სასურველია, მაგრამ აუცილებელი არ არის, ქვესტურაც და პრეფექტურაც უზრუნველყოფენ თარჯიმნით მომსახურებას.

- თუ აქვს სტუმარს სტატისტიკა რამდენმა აპლიკანტმა ვერ მიიღო საბუთი?

- მსგავსი სტატისტიკა არ არსებობს.

- იტალიაში დაბადებული ბავშვის შემთხვევაში, მშობლებს უადვილდებათ საბუთების გაკეთება?

- დიახ, ბავშვის იტალიაში დაბადების შემთხვევაში, მშობლებს უადვილდებათ საბუთების წარმოება, თუ  გავითვალისწინებთ 31-ე მუხლის დებულებებს, რომელიც შესაძლებლობას აძლევს არასრულწლოვანს და მშობელს მოითხოვონ ბინადრობის ნებართვა.

- რა შეღავათებით სარგებლობს თავშესაფრის მოთხოვნით სტატუსის მიღების შემდეგ პირი?

- ანალოგიური უფლებებით და შეღავათებით რომლებითაც სარგებლობენ იტალიის მოქალაქეები, იქნება ეს სამედიცინო მომსახურება, საოციალური სერვისები, თუ განათლების მიღება და ა.შ.

- პოლიტიკური სტატუსის მქონე 5 წლიანი საბუთის მქონეს, როდესაც გინდა შეიტანო მოქალაქეობაზე განაცხადი, როგორც ვიცი უნდა გქონდეს ბოლო სამი წლის გადახდილი კონტრიბუტები (დღგ), რამდენად შეესაბამება სიმართლეს?

- პოლიტიკური მოტივით დევნილის სტატუსის მიღების შემთხვევაში, ეს რეკვიზიტები საჭირო არ არის.

- თავშესაფრის მოთხოვნით საბუთის გაკეთების შემდეგ პასპორტი უნდა დაიტოვოს სახელმწიფომ?

- სანამ საქმე წარმოებაშია, პასპორტი რჩება ქვესტურაში, მაგრამ ნებისმიერ დროს, შეგიძლიათ უარი თქვათ დაცვის მოთხოვნაზე და პასპორტი გამოითხოვოთ.

- ძალიან გთხოვთ მიპასუხოთ, ჩაბარების შემთხვევაში, თუ ხდება წამლებით უზრუნველყოფა?

- არსებობს მედიკამენტების კატეგორია, რომელსაც ჯანდაცვის სამსახური უფასოდ უზრუნველყოფს.

- მოგესალმებით, მე ვარ დევნილი 2008 წლიდან და ამ მიზეზით თუ შემიძლია თავშესაფრის შესახებ განაცხადის გაკეთება?

- რა თქმა უნდა, შეგიძლიათ.

გადაცემა სრულად შეგიძლია იხილოთ აქ 👇