თუ საქართველოში ყოფნის დროს, თქვენს იტალიურ ბინადრობის ნებართვას - "Permesso di soggiorno"-ს ვადა გაუვიდა

მოგეხსენებათ, ყველა საბუთს აქვს თავისი ვადა და განახლების წესი, რომელთა დარღვევამაც, შესაძლოა კონკრეტული საბუთის დაკარგვის საფრთხის წინაშე დაგაყენოთ. ამჯერად, საუბარი გვექნება იტალიური ბინადრობის დროებით ნებართვაზე - "Permesso di soggiorno"-ზე.

შეგახსენებთ, რომ აღნიშნული საბუთის მფლობელ საქართველოს მოქალაქეს, სამშობლოში წასვლა და ასევე ევროკავშირის ქვეყნებში მოგზაურობა თავისუფლად შეუძლია, მაგრამ რა ხდება და როგორ უნდა მოიქცეთ იმ შემთხვევაში, თუ საქართველოში ყოფნისას თქვენს იტალიურ ბინადრობის ნებართვას ვადა გაუვიდა?

განვიხილოთ დეტალურად:

ასეთ შემთხვევაში,

შეგიძლიათ მოითხოვოთ იტალიაში დასაბრუნებელი ვიზა, მაგრამ არა ყოველთვის! რა შემთხვევაში გაქვთ, დასაბრუნებელი ვიზის მოთხოვნის უფლება?

• თუ "პერმესოს" ვადის გასვლიდან არ გასულა 60 დღე;
• თუ საბუთის ვადის გასვლიდან, გასულია 60 დღე, მაგრამ გაქვთ საპატიო მიზეზი. მაგალითად: სამხედრო სამსახურის მოხდა; ავადმყოფობა; ოჯახის წევრის ჯანმრთელობის ისეთი მდგომარეობა, რომელიც პირის უშუალო ჩართულობას ითხოვდა, ავადმყოფის მკურნალობისა და მოვლის პერიოდში.

რა საბუთები უნდა წარადგინოთ დასაბრუნებელი ვიზის მოთხოვნისას?

• ვადაგასული იტალიური ბინადრობის ნებართვის ორიგინალი და ასლი;
• პასპორტი;
• თუ საბუთის ვადის გასვლიდან 60 დღეა გასული, უნდა წარადგინოთ ოფიციალური დოკუმენტაცია, რაც თქვენი საქართველოს იმ პერიოდში ტერიტორიაზე დარჩენის აუცილებლობას ადასტურებს;
• პირმა დოკუმენტურად უნდა დაამტკიცოს იტალიასთან სოციალურ-ეკონომიკური კავშირი.

ვის უნდა მიმართოთ?

• ზემოთ აღნიშნული დოკუმენტაცია უნდა წარადგინოთ იტალიის რესპუბლიკის საკონსულოში. საკონსულო ინფორმაციას გადასცემს იტალიის მხარეს, შესაბამის ქვესტურას და ვიზას გასცემს მხოლოდ იტალიიდან მიღებული ნებართვის, ე.წ. "Nula osta"-ს მიღების შემთხვევაში.

როგორ უნდა მოიქცეთ იტალიაში დაბრუნების შემდეგ?

• მას შემდეგ, როდესაც იტალიაში დაბრუნდებით, ქვეყნის ტერიტორიაზე შესვლიდან 8 დღის განმავლობაში უნდა შეიტანოთ საბუთები, "Permesso di soggiorno"-ს განახლების მოთხოვნით.

ნინა მამუკაძე

იტალია, ფლორენცია