უკრაინაში იტალიიდან დასახმარებლად ჩასული ლუკა ჩიქოვანი, ჯერ რუსი ჯარისკაცი, ხოლო შემდეგ უკრაინელი დეზერტირი ეგონათ - მსახიობი ქართულმა პასპორტმა იხსნა

გუშინ, EcxlusiveTV იტალიაში მოღვაწე ქართველი მომღერლისა და მსახიობის, ლუკა ჩიქოვანის შესახებ წერდა, რომელიც უკრაინაში თავის სარეკლამო აგენტთან ერთად, სამედიცინო ჰუმანიტარული ტვირთის წასაღებად პირადად წავიდა. "ჩვენ დღეს უკრაინაში მივდივართ, ორი კვირის წინ დამიკავშირდა უკრაინის კოროსტენის ცენტრალური საქალაქო საავადმყოფოს მთავარი ექიმი. აღნიშნული საავადმყოფო ომის ხაზთან მდებარეობს. მან მითხრა, რომ მათი ჰოსპიტალი ჰუმანიტარულ დახმარებებს ვერ იღებდა, სწორედ ომის ხაზთან სიახლოვის გამო,"- წერდა სოციალურ ქსელში ლუკა ჩიქოვანი.

თუმცა, ამბავი ამით არ დასრულებულა. როგორც ირკვევა, მათ უკრაინის საზღვარი უპრობლემოდ გადალახეს, რადგან უკრაინის საკონსულოს მიერ გაცემული ნებართვა ჰქონდათ, მაგრამ გზაში დაუღამდათ, უამინდობის გამო, გზებზე რთული მდგომარეობა დახვდათ და მინი ავტობუსი ტყეზე გამავალ უკაცრიელ გზაზე, ტალახში ჩავარდა. ლუკას თანამგზავრი მანქანაში დარჩა, რადგან ჰუმანიტარული ტვირთის დაკარგვის შეეშინდათ, ხოლო ლუკამ თითქმის ერთი საათი ღამე ტყეში ფეხით იარა, რომ დასახლებულ პუნქტამდე მიეღწია და დახმარება ეთხოვა.

"ბოლოს გზა ვიპოვე და ფერმერის მანქანა გავაჩერე. თავიდან ფერმერმა იფიქრა, რომ ომიდან გამოქცეული რუსი, ან უკრაინელი ჯარისკაცი ვიყავი, გაბრაზებულმა მეგობრებს დაურეკა და ბრძოლის ხაზის მიმართულებით უნდოდა წასვლა. მაგრამ ქართული პასპორტი ვაჩვენე, რამაც მაშინვე დაარწმუნა რომ არ ვიტყუებოდი და დახმარების მოძებნაშიც დამეხმარა. მიმიყვანა პოლიციაში, რომლებმაც როცა გაიგეს, რომ კოროსტენის ჰოსპიტალისთვის სამედიცინო ტვირთი მიგვქონდა, მეხანძრეებიც გამოიძახეს. მეხანძრე-მაშველებმა ტალახიდან მანქანაც ამოგვაყვანინეს და ჰოსპიტალამდეც მიგვაცილეს. გიჟური ღამე იყოს, მაგრამ ყველაფერი კარგად დამთავრდა, რაც მთავარია, ახლა კოროსტენის საავადმყოფოს პაციენტებს, საჭირო მედიკამენტები აქვთ," - აცხადებს ლუკა ჩიქოვანი.

ნინა მამუკაძე

ფლორენცია, იტალია