ვენეციის ყველაზე ცნობილი სასტუმრო ბილ გეითსმა შეიძინა (FOTO)

სასტუმრო "დანიელი" ვენეციის ბრწყინვალების სინონიმია, ითვლება მსოფლიოში ერთ-ერთ ყველაზე ცნობილ სასტუმროდ. მისი  ისტორია იწყება მე -14-ე საუკუნეში, როდესაც სასტუმროს მთავარი შენობა პალაცო დანდოლო, დიდგვაროვანი ვენეციური ოჯახის - დანდოლოს დაკვეთით აშენდა.  

ვენეციის დოჟების კარზე  დანდოლოს ოჯახმა უდიდესი პოპულარობა მოიპოვა, როდესაც მან დაიპყრო კონსტანტინოპოლი 1204 წელს და დაბრუნდა ქალაქში ნაძარცვი ოქროს, მარმარილოს და ბიზანტიური ნაკეთობებით, მათი ნაწილი შემდგომში შეიტანეს  დანდოლოს სასახლის ინტერიერში.

დროთა განმავლობაში დაემატა კიდევ ორი შენობა (შემდგომში ზოგი გადააკეთეს, ზოგი დაანგრიეს და თანამედროვე არქიტექტურით ჩაანაცლეს). სამივე სასახლეში განთავსებულია ხელოვნების ნიმუშების მდიდარი კოლექცია და ძვირფასი ანტიკვარიატი, რომლებიც ქალაქის ისტორიას ასახავს და კარგად ერწყმის  თანამედროვე ინტერიერის  ელემენტებს.

როგორც სასტუმრო, ფუნქციონირებს 1822 წლიდან. მთავარ შენობას ბევრჯერ ჩაუტარდა რესტავრაცია, თუმცა მე-14-ე საუკუნის გოთური არქიტექტურა, სტილი და ბრწყინვალება მკაცრად დაცული და შენარჩუნებულია.

სწორედ ამ არქიტექტურით და საოცარი ხედით ვენეციის ლაგუნაზე, სასტუმრო "დანიელი" მთელი თავისი ისტორიის განმავლობაში,  მრავალი გამორჩეული სტუმრის საყვარელი ადგილი იყო და არის, მათ შორის უცხო ქვეყნის ხელისუფლების წარმომადგენლები, სახელმწიფო მეთაურები და ცნობილი ადამიანები კინოდან და მუსიკიდან.

ახლახან ცნობილი გახდა, რომ სასტუმრო ბილ გეითსმა შეიძინა, მის სრულ რესტავრაციას აპირებს და 2024 წელს მზად იქნება 200 ოთახით.
ზუსტი ფასი უცნობია, თუმცა რამდენიმე ასეული მილიონი ევროა.

P.S. იმედია ბანალურ რკინის მონსტრად არ აქცევენ და შეუნარჩუნებენ შუასაუკუნოვან სტილს და ხასიათს.

ნატო როზომაშვილი სპეციალურად ExclusiveTV.ge-თვის ბარიდან