"ანგელოზად გაფრენილო პატარა მარიტა იქ ზეცაში მფარველად, უფლისწულნი გელიან: ნიკო, გიორგი, მირიანი, ლუკა" - ნიკო კვარაცხელიას დედის ემოციური პოსტი

პლატფორმა „ფიდსის" დამფუძნებლის, თბილისში მოკლული ნიკო კვარაცხელიას დედა, იზა ომაძე ვაკის პარკის ტრაგედიას ეხმაურება და ემოციურ პოსტს ავრცელებს:

"კი, რაღაც ყველაფერს პროვოკაციის სუნი ასდის:

ხომ იცოდა გაფრინდაშვილმა, რომ დააპატიმრებდნენ, რაღას გადადიოდა იმ მხარეს?

ხომ იცოდა ტატუნაშვილმა, რომ მოკლავდნენ, რაღატომ გადაწყვიტა წასვლა?

ანწუხელიძემ ხომ იცოდა, რუსეთი რომ დიდია და მაგას ვერ მოერევი, რატომ არ დანებდა?

ზვიად გამსახურდიამ ხომ იცოდა, რომ მოკლავდნენ, რაღას ბრუნდებოდა სამშობლოში?

ხომ იცოდა მიხეილ ჯავახიშვილმა, რომ აწამებდნენ და დახვრეტდნენ?

და ილია ჭავჭავაძემ ხომ იცოდა, გულში ტყვიის დახლა რომ არის სამშობლოს გულით სიყვარულის ბოლო?

დიმიტრი ყიფიანმაც ხომ იცოდა? თევდორე მღვდელმა? ხომ იცოდა შუშანიკმა საპყრობილეში რომ ამოალპობდნენ?

ან ამ აბოს რაღა რჯიდა? იცოდნენ, იცოდნენ და რომ იცოდნენ, იმიტომ ზიხართ ახლა თქვენ დამოუკიდებელი საქართველოს რომელიღაც ქალაქში, თბილ ოთახში და დიდი წვალებით, მაგრამ მაინც რუსული შრიფტით აცოდვილებთ ბრძნულ შეკითხვას:

ხომ, იცოდა? და მე გპასუხობთ – იცოდა". გიორგი კეკელიძე.

ჩვენმა შვილებმაც ხომ იცოდნენ რომ მალე მოკვდებოდნენ და რატომ დაიბადნენ???

რატომ სუნთქავდნენ? რატომ თამაშობდნენ, რატომ? რატომ?

მეც შვილმოკლულმა, განადგურებულმა დედამ ვიცი!

კარგად ვიცი ეშმაკთან ბრძოლის საფრთხეები, მაგრამ სვეტიცხოვლის მადლი შეგეწიოს ჩემო ბედკრულო და გათითოკაცებულო ქვეყანავ მართალთა შორის განისვენე ანგელოზად გაფრენილო პატარა მარიტა იქ ზეცაში მფარველად, უფლისწულნი გელიან:

ნიკო, გიორგი, მირიანი, ლუკა ჩვენი ხვედრი კი მიწაზე ტანჯვა და იმიერში შვილებთან ჩახუტების იმედია", - წერს ნიკო კვარაცხელიას დედა.

ვაკის პარკის შადრევანში ბურთის ამოსაღებად ჩასულ სამ არასრულწლოვანს დენმა დაარტყა.ერთ-ერთი მათგანის, მარიტა მეფარიშვილის გადარჩენა ვერ მოხერხდა. მომხდარ ფაქტთან დაკავშირებით, შინაგან საქმეთა სამინისტრომ გამოძიება დაიწყო. 

ასევე დაგაინტერესებთ:

* "ერთ-ერთ ფრანგულ ჰოსპიტალში, სისხლის ბანკიდან ადამიანებს შიდსის ვირუსით დაინფიცირებული სისხლი გადაუსხეს. ისინი დაინფიცირდნენ - არავითარი კავშირი, არ ჰქონდა კლინიკასთან, მაგრამ ჯანდაცვის მინისტრი ეგრევე გადადგა"