აშშ-ის სახელმწიფო მდივნის თანაშემწე: საქართველომ ათწლეულების განმავლობაში მნიშვნელოვან პროგრესს მიაღწია, მაგრამ ის, რასაც ახლა ვხედავთ, ძლიერ გვაშფოთებს, რადგან ვხედავთ დემოკრატიულ უკუსვლას

"საქართველომ ათწლეულების განმავლობაში მნიშვნელოვან პროგრესს მიაღწია, მაგრამ ის, რასაც ახლა ვხედავთ,ძლიერ გვაშფოთებს, რადგან ვხედავთ დემოკრატიულ უკუსვლას საქართველოში", - ამის შესახებ ევროპის საკითხებში აშშ-ის სახელმწიფო მდივნის თანაშემწემ, კარენ დონფრიდმა აშშ-ის სენატის საგარეო ურთიერთობების კომიტეტის სხდომაზე, სადაც კავკასიაში აშშ-ის პოლიტიკა შეაფასეს, სენატორ ბენ კარდინის კითხვის საპასუხოდ განაცხადა.

„აშშ მხარს უჭერს საქართველოს და ჩვენ ვნახეთ მნიშვნელოვანი პროგრესი ბოლო ათწლეულების განმავლობაში და ამ პროგრესზე დაყრდნობით ჩვენ საქართველოსთან სტრატეგიული პარტნიორობა გვაქვს და ის, რასაც ახლა ვხედავთ ძლიერ გვაშფოთებს, რადგან ვხედავთ დემოკრატიულ უკუსვლას საქართველოში.

მე ვიყავი საქართველოში იმ დღეს, როდესაც ევროკომისიამ მიიღო გადაწყვეტილება, რომელიც შემდეგ კვირაში ევროპული საბჭოსგან მოვიდა, რომ საქართველოს მიენიჭებოდა ევროპული პერსპექტივა, როცა უკრაინასა და მოლდოვას კანდიდატის სტატუსი მიენიჭა და ეს ძალიან ემოციური იყო საქართველოში.

მქონდა ლანჩი სამოქალაქო საზოგადოების წარმომადგენლებთან, რომლებსაც თვალზე ცრემლები ჰქონდათ, რადგან საქართველო, როგორც იცით იყო ლიდერი ევროკავშირში გაწევრიანების გზაზე. ის, რაც საქართველოზე ჩემს ყურადღებას იქცევს, არის რომ ქართველების 85 პროცენტი მხარს უჭერს ევროატლანტიკურ მისწრაფებას და ვფიქრობ, ეს ახდენს ზეწოლას მთავრობაზე.

ჩვენ ვეუბნებით საქართველოს მთავრობას, რომ ვუერთდებით ევროკავშირის იმ რეფორმების სიას, რომლის გატარებისკენაც ევროკავშირი მოგიწოდებთ კანდიდატის სტატუსის მისაღებად.

ჩვენ ყველანი ვიმედოვნებთ, რომ თქვენ განახორციელებთ ამ რეფორმებს და ჩვენ ჯერ კიდევ იმედი გვაქვს, რომ პროგრესი იქნება, მაგრამ ჩვენ აბსოლუტურად შეშფოთებულები ვართ, რომ დღეს ეს პროგრესი არ არსებობს.

მინდა ყველას შევახსენო, რომ რუსეთი აგრძელებს საქართველოს ტერიტორიის 20 პროცენტის ოკუპაციას და სურს უარყოფითი ზეგავლენა მოახდინოს საქართველოს დამოუკიდებლობაზე, მის აშშ-სთან ურთიერთობებზე და მის დემოკრატიაზე.

ასე, რომ მჯერა, რომ ჩვენი უწყვეტი ჩართულობა და მხარდაჭერა კრიტიკულად მნიშვნელოვანია საქართველოს მომავლისთვის და სამხრეთ კავკასიისთვის“, - აღნიშნა კარენ დონფრიდმა.

აშშ-ის სახელმწიფო მდივნის თანაშემწეს სენატორმა ბენ კარდინმა ასეთი შეკითხვა დაუსვა:

"ჩვენ ვნახეთ წარმოუდგენელი უკუსვლა დემოკრატიულ წინსვლაში. ევროკავშირმა განასხვავა უკრაინა და მოლდოვა საქართველოსგან, რაც აშკარად მიუთითებს იმაზე, რომ ევროკავშირი ხედავს უკანდახევას.

ვნახეთ ჩვენი ელჩის კრიტიკა, ვნახეთ სასამართლო სისტემის რეფორმის წარუმატებლობა, რა არის ჩვენი სტრატეგია საქართველოს დემოკრატიული ინსტიტუტების წინსვლის მიმართ და როგორ ვაპირებთ პროგრესის მიღწევას?“.

წყარო: ipn

ასევე დაგაინტერესებთ:

📍ჯანდაცვის სამინისტროს ცნობით, პროფესიული განვითარების საბჭომ ოთხ ექიმს სახელმწიფო სერტიფიკატის მოქმედება სხვადასხვა ვადით შეუჩერა

📍„იტალიაში ცხენის ხორცის სპეციალური მაღაზიებია, ხოლო ვირის ხორცი დელიკატესად ითვლება“ - სოციალური მედია