გიორგი აბდალაძე: დღეს რომ ადამიანი გლდანის ციხიდან გაღიმებული გამოდის, „ქართული ოცნების“ და ბიძინა ივანიშვილის დამსახურებაა

დღეს რომ ადამიანი გლდანის ციხიდან გაღიმებული გამოდის, ზუსტადაც „ქართული ოცნების“ და ბიძინა ივანიშვილის დამსახურებაა, - ასე გამოეხმაურა სოციალურ ქსელში ფოტოგრაფი გიორგი აბდალაძე ლაზარე გრიგორიადისის ციხიდან გათავისუფლების ფაქტს.

მისი თქმით, „ნაციონალური მოძრაობის“ ხელისუფლებაში ყოფნის პერიოდში საქართველო პატიმრებისა და ციხეში გარდაცვლილთა რაოდენობით ევროპაში ლიდერობდა. მაშინ არცერთ არასამთავრობო ორგანიზაციას ამაზე ხმა არ ამოუღია.

„კარგად მახსოვს ის ჯოჯოხეთი და უსამართლობა, რასაც გლდანის ციხე ჰქვია. ყოველდღე ნაცემი პატიმრები, შეურაცხყოფები. ერთადერთი ნატვრა, რაც იყო, როგორმე ცოცხალი გამოსულიყავი იმ ჯოჯოხეთიდან, სადაც ხდებოდა სხვისი ქონების წართმევა. იმ პერიოდში საქართველო ლიდერობდა პატიმრების და ციხეში გარდაცვლილების რაოდენობით ევროპაში. უამრავი დედა, რომელთაც ხელის გულზე ეწერათ ნომრები და თვეობით ელოდებოდნენ შვილთან შეხვედრას. არცერთ ე.წ. არასამთავრობო ორგანიზაციას ამაზე ხმა არ ამოუღია.

დღეს რომ ადამიანი გლდანის ციხიდან გაღიმებული გამოდის, ზუსტადაც „ქართული ოცნების“ და ბიძინა ივანიშვილის დამსახურებაა. რომ არა გაზეთი „ალია“, რედაქტორი გიორგი ბრეგვაძე და უამრავი ჟურნალისტი, რომლებიც საკუთარი სიცოცხლის რისკის ფასად აპროტესტებდნენ უსამართლობას, ჩვენ იქიდან ცოცხალი ვერ გამოვიდოდით ისევე, როგორც გლდანის ციხეში ნაწამები და მოკლული პოლკოვნიკი თეთრაძე და მრავალი სხვა ადამიანი“, - წერს გიორგი აბდალაძე.