"რამდენი მუშა გარდაიცვალა იმიტომ, რომ არაკვალიფიცირებული იყო? რამდენი ადამიანი დაზარალდა იმიტომ, რომ რაღაც არაკვალიფიციურად იყო გაკეთებული?" - ქეთი ცერცვაძე

მათემატიკის კურიკულუმის განვითარების ექსპერტი განათლების სამინისტროში ქეთი ცერცვაძე სოციალურ ქსელში წერს:

"სინამდვილეში ყველაფერი ყველას ბრალია, იმიტომ რომ საფუძველში არასწორი ფასეულობები გვაქვს მიღებული, იმიტომ, რომ მთავარი უგულებელვყავით და ერთმანეთზე ღვარძლის ნთხევით გულს ვიფხანთ.

ილიას აქვს ნათქვამი: გულის ფხანა ქეცმა იცის, ნუ გაიქეციანებ გულს და ფხანაც საჭირო არ იქნებაო.

ახლა იგივე სხვანაირადაც რომ ვთქვა:

იმისათვის, რომ მათემატიკაში რაიმე თეორემა მივიჩნიოთ ჭეშმარიტად , ის უნდა ეფუძნებოდეს უკვე დამტკიცებულ თეორემებს ან აქსიომებს. აქსიომებს რასაკვირველია დამტკიცება არ სჭირდება, ცხადია და ჭეშმარიტი.

საქართველოში ბოლო ათწლეულები დამკვიდრდა და აქსიომად იქცა ასეთი რამ:

ბიზნესის ხელშესაწყობად საჭიროა იაფი მუშახელი , მთავარია ბიზნესზე ხელშეწყობა, ოღონდ აქ ფული ჩადონ და ჩვენთან ბაზარი სავსეა იაფი მუშახელით და ა.შ. და ა.შ.

სანამ ეს მცდარი დებულება, არ შეიცვლება ჭეშმარიტი დებულებით, რომ მთავარია კვალიფიცირებული მუშახელი, სულ წრეზე ვივლით უამრავი ტრაგედიებით, გავაუბედურებთ ერთმანეთს, ერთმანეთის ცოდვით და საცოდაობით კანი დაგვეწვება, ვიტირებთ, ვიჩხუბებთ და ვივლით წრეზე.

მე ყველა მეცოდება, ყველა უკიდეგანოდ, იმიტომ რომ რაღაცის ვერ გააზრების და ვერ გაკეთების მსხვერპლები ვართ ასე მგონია.

რამდენი მუშა გარდაიცვალა იმიტომ, რომ არაკვალიფიცირებული იყო? რამდენი ადამიანი დაზარალდა იმიტომ, რომ რაღაც არაკვალიფიციურად იყო გაკეთებული?

რამდენი უნივერსიტეტია კერძო სადაც უაღრესად კვალიფიცირებულ კადრს, ან მეცნიერს 200-300-400 -1000 ლარს უხდიან ხელფასის სახით? იმიტომ რომ ბიზნესს მეტი უნდა დარჩეს და ბაზარი ასე "არეგულისრებს".

შეიძლება ერთ დღესაც სასწაულად კვალიფიცირებული კადრი წავიდეს და დასაქმდეს მშენებლობაზე, ან გლოვოში, იმიტომ რომ ხელფასი იქ 3000 ლარი ექნება.

და იქცეს არაკვალიფიცირებულ მუშახელად.

( თავისთავად ეგეც ტრაგედიაა).

მერე იმიტომ, რომ მართვა კარგად არ იცის ავარიაში მოხვდეს ან თავად დაიღუპოს ან სხვა დაღუპოს?

ან იმიტომ რომ ფიზიკურად შრომას მიუჩვეველია გადმოვარდეს საიდანმე?

ან სასოწარკვეთილს საერთოდ დაავიწყდეს რას აკეთებს და ან რა უნდა გაეკეთებინა?

ამით იმის თქმა მინდა, რომ როგორმე უნდა თვითგამოვერკვეთ, ურთიერთსაწინააღმდეგო დებულებების ხარა ხურს მოვეშვათ, თავში დავილაგოთ რაღაც ძალიან ცხადი ფასეულობები (აქსიომატური ჭეშმარიტებები) და ვცადოთ რამის შენება.

თან ისე, რომ ერთმანეთი არ გამოვფიტოთ და შევჭამოთ..

არც კი მინდა ბავშვზე ვისაუბრო, მე წლების წინ მოსწავლე გარდამეცვალა და მერე წლები მასწავლებლობა აღარ შემეძლო, აღარც მინდოდა, იმდენად მძიმე ამბავია.

არც ახლა შემიძლია რამის დაწერა.

არც მშობლებზე შემიძლია რამის თქმა, არ მგონია არსებობდეს სიტყვები მათი დარდის აღსაწერად ან შესაფასებლად, ან თანაგრძნობისთვის",- წერს განათლების ექსპერტი.

ასევე დაგაინტერესებთ:

* "17 წელია მასწავლებელი ვარ, მილიონგამოცდაჩაბარებული, ჰოდა, ზუსტად 2500 ლარის ნახევარი მაქვს ხელფასი" - რა წერილს აქვეყნებს ლექტორი დავით წამალაშვილი

* "ახლა მივხვდი, რატომ შემოვიდა ამდენი რუსი მარტიდან უკვე აქ - ბევრი აქ ჩამოსული რუსი, სულ არ გაქცევია რაიმე რეჟიმს, უბრალოდ ჯიბეზე ფიქრობდნენ და შემოსავალზე" - რას წერს "რუსების შემოსევაზე" განათლების ექსპერტი