"სენსორულ კარის სისტემა იყო არეული" - "საქართველოს ბანკი" განმარტებას ავრცელებს

"საქართველოს ბანკი" სოციალურ ქსელში ქველმოქმედ აკა სინჯიკაშვილის მიერ გავრცელებულ პოსტს ეხმაურება, რომელსაც საზოგადოების მწვავე კრიტიკა მოჰყვა.

სინჯიკაშვილის თქმით, ბანკის წარმომადგენლებმა უსახლკაროს ისეთი პირობები შეუქმნეს, რომ შუაღამეს ის იძულებული გახდა, შენობა დაეტოვებინა.

აღნიშნულ ბრალდებებს ბანკმა უპასუხა და განცხადებასთან ერთად, სათვალთვალო კამერის მიერ გადაღებული ვიდეოკადრები გამოაქვეყნა.

"მოგესალმებით,

გვსურს, გამოვეხმაუროთ სოციალურ ქსელში გუშინ გავრცელებულ პოსტს.

საქართველოს ბანკს 7000-ზე მეტი ადამიანი ქმნის, ყველას გვყავს ბებია, ბაბუა, ასაკოვანი მშობელი.

ჩვენთვის ყველა ასეთი ადამიანი გულთან ძალიან ახლოს მისატანია და ყოველთვის ვცდილობთ, რომ უყურადღებოდ არ დავტოვოთ.

ბებო, რომელიც ჩვენს ფილიალში რამდენიმე კვირა აფარებდა თავს, თანამშრომლებისთვის შეუმჩნეველი არ დარჩენილა.

ჩვენ გუშინ ღამევე ვესაუბრეთ პოსტის ავტორს და ავუხსენით, რომ ბებოსადმი მსგავსი მოპყრობა ჩვენს ყველა ღირებულებას სცდება და ღამევე დავიწყეთ საკითხის მოკვლევა.

მივედით ფილიალში, შევამოწმეთ კარი, ვნახეთ კამერების ჩანაწერები. რის შედეგადაც აღმოჩნდა, რომ ავტომატურ და სენსორულ რეჟიმზე მომუშავე კარის სისტემა იყო არეული და პერიოდულად რჩებოდა ღია. მომხმარებლები ბარათის საშუალებითაც ვერ შედიოდნენ ფილიალში.

ჩვენთვის ძალიან მტკივნეული და მიუღებელია მიუსაფარი ადამიანი დატოვო ღია ცის ქვეშ, ყინვაში.

სამწუხაროა, მაგრამ ასეა - საქართველოს ბანკის ფილიალებში წლებია ადამიანები ყოველდღიურად პოულობენ ღამის გასათევს, როგორც თავშესაფარს.

თითოეული ასეთი ადამიანის უკან მათი ისტორია და სულიერი ტკივილია.

გულსატკენია იმის დაშვებაც კი, რომ ნებისმიერმა ადამიანმა, გამიზნულად ღამე ყინვაში დატოვა მოხუცებული ბებო", - აღნიშნულია ბანკის მიერ გავრცელებულ ინფორმაციაში.

ბლოგერმა, ქველმოქმედებით ცნობილმა აკა სინჯიკაშვილმა, სოციალურ ქსელში დაწერა, რომ მიუსაფარ ბებოს, რომელიც ღამეს "საქართველოს ბანკის" ერთ-ერთი ფილიალის ფოიეში ათენებდა, ბანკის ადმინისტრაციამ გათბობა გამოურთო.

ამავე თემაზე:

"ძალიან სასწრაფოა! მოხუცი, ავადმყოფი ქალი ვნახეთ ქუჩაში, სულ გაყინული" - რას წერს ბლოგერი