„შენი დემოკრატიის რა ვთქვი მე, განვითარებულო მსოფლიოვ!“ - თამთა დოლიძე

ჟურნალისტი და ხელოვნებათმცოდნე, თამთა დოლიძე სოციალურ ქსელ „ფეისბუკში“ პოსტს აქვეყნებს. 

„ტყუილად დაიწერა გილგამეში, კარამაზოვები თუ დონ კიხოტი.
ტყუილად შექმნეს ბეთჰოვენმა და მოცარტმა სიმფონიები.
ტყუილად დავხატეთ გერნიკა.
ტყუილად გავუშვით კოსმოსში საუკეთესო მუსიკა, რაც კაცობრიობას გაგვაჩნდა. ტყუილად ვმუშაობთ სამეცნიერო მიღწევებისთვის.
სასაცილოა ტექნიკური პროგრესი, ხელოვნური ინტელექტი და ის ფაქტი, რომ ციფრულ ეპოქაში ვცხოვრობთ.
ირონიულია ყველა პაქტი, კონვენცია თუ კანონი, რომელიც ადამიანის უფლებებს ეხება.
სისულელეა საუბარი ყველა დემოკრატიულ არჩევანსა და ჰუმანიზმზე ადამიანებს შორის.

ჩვენც ადამიანთა ის ნაკადი ვყოფილვართ, სამყაროს პირველი თაობიდან, როცა ყველაფერი სისხლით და ძალის დემონსტრირებით გვარდებოდა. ისევ სხვისი მიწა გვეხარბება, ისევ ერთმანეთის გვამებზე დავდივართ, ისევ ბავშვების სისხლით ვერ ვძღებით, ბომბების ხმებით ვერ ვძღებით, ერთმანეთის შიშის და ტკივილის ხმებით ვერ ვძღებით და ამ ფონზე ყველაფერი კანონმდებლობაში, მეცნიერებასა თუ ხელოვნებაში, რაც ათეულობით საუკუნის მანძილზე შევქმენით ამაო და გამაღიზიანებელია ჩემთვის!

ისეთი შეგრძნება მაქვს, თითქოს მატარებლით მივდიოდი საუკუნეების მანძილზე და უცებ აღმოვაჩინე, რომ მატარებელი არც კი დაძრულა ადგილიდან.

2022 წელს, ლამის შუაგულ ევროპაში ბავშვებს უმოწყალოდ ხოცავენ და ვხვდები, რომ ჩვენ კაცობრიობას ტყუილად გვიცხოვრია: არაფერიც არ პროგრესირებულა ადამიანში. ისევ იქ ვართ, რომში, სტადიონზე, ხელში პური გვიჭირავს და გლადიატორების სანახაობას ვუცქერით.
პოლიტიკაში კი ისევ ძალა ხნავს აღმართს, ზუსტად ისე, როგორც უხსოვარ დროში იყო.
შენი დემოკრატიის რა ვთქვი მე, განვითარებულო მსოფლიოვ!“

აგრეთვე დაგაინტერესებთ:

📌 "მოვრჩეთ გულზე მუშტების ბრახუნს - მე კარგი ვარ და მთავრობაა ცუდი!" - ირინა სარიშვილი

📌 "მეორედ პოსტავ, უკრაინელ გოგოს სამი თვით ბინა სჭირდება 400$-ის ფარგლებში - ასეთ მოკლე პერიოდზე არავინ არ აქირავებს, ზოგს უკრაინელის ხსენებაც კი არ უნდა" - ისტორია სოციალური ქსელიდან

📌 "რუსთავი 2"-დან წამოვედი" - რატომ დატოვა ია ფარულავამ ტელეკომპანია

📌 სოციოლოგი: უკრაინა ჩემთვის ქრისტეა, რომელიც დღეს კაცობრიობისთვის ეწამება - ძალიან მინდა, რომ საქართველოც მოხვდეს ამ ნავში