"ზელენსკიმ ბუბა კიკაბიძის სამძიმარში ქართველები დიად ერად მოგვიხსენია. ესეც კამათის საბაბი გახდა, რაღა გვაქვს დიადისო" - ნათია ფანჯიკიძე

ქართველი კინომსახიობი, საესტრადო მომღერალი, სცენარისტი, კინორეჟისორი, სიმღერების ავტორი ბუბა კიკაბიძე 84 წლის ასაკში გარდაიცვალა. სამწუხარო ფაქტს სოციალურ ქსელში უკრაინის პრეზიდენტი, ვოლოდიმირ ზელენსკი გამოეხმაურა და დაწერა, რომ "ვახტანგ კიკაბიძე, დიდებული ერის დიდებული ადამიანი" - იყო.

აღნიშნულ სამძიმარს არაერთი კრიტიკა მოჰყვა, რომელსაც ფსიქოლოგი, ნათია ფანჯიკიძე სოციალურ ქსელში ეხმაურება:

"ზელენსკიმ ბუბა კიკაბიძის სამძიმარში ქართველები დიად ერად მოგვიხსენია.

ესეც კამათის საბაბი გახდა, რაღა გვაქვს დიადისო.

რა თქმა უნდა, პარალელურად რომ გაიგებ, რომ ქართველების ნაწილს გმირობა ის ჰგონია, ბერძენიშვილის ლექციას რომ ჩაშლის და გამარჯვების ყიჟინა აქვს ატეხილი, იიი, არ ვალაპარაკეთ, რა მაგრად მოვიქეცით!

თუ ეროვნულ იდენტობას მათზე გაასწორებ, "შიდაგმირობების" - ერთმანეთის თელვის მაგალითებს თვისებად მიიწერ, კომპლიმენტის მიღება გაგიჭირდება, მაგრამ საბედნიეროდ, საქართველო ის ქვეყანაა, სადაც უამრავი ნამდვილი გმირი იბადება, მეცნიერებიც, არტისტებიც და უბრალოდ საუკეთესო მოქალაქეები, რომლებიც 24-საათიანი შრომის ფასად მოქმედს ხდიან ამ ფერდებმორყეულ, ხალხისგან სანახევროდ დაცარიელებულ ქვეყანას.

ხოდა დიადია ქართველი ერი, ნამდვილად არის და მადლობა ამის დამნახავს", - წერს ფანჯიკიძე.

ამავე თემაზე:

* "დიდი ერის დიდი ადამიანი" - ზელენსკი ბუბა კიკაბიძეზე