"გუბანოვა სულ სხვა სტილია, ნასტასია არ ებრძვის ყინულს, არ თხრის მის ზედაპირს ციგურებით. დასრიალებს და დაცურავს - მას თუკი რამე აკლია,აკლია იმიტომ რომ ვარჯიშობს საბჭოთა ტრადიციებით"

ჟურნალისტი, ხელოვნებათმცოდნე, პროფესორი გოგი გვახარია ანასტასია გუბანოვას შესახებ წერს:

"გუბანოვა სულ სხვა სტილია.

სწორედ ესაა ფიგურული სრიალი და არა გაწვრთნილი ბავშვების ხელაწეული ტრიალი ჰაერში.

ნასტასია არ ებრძვის ყინულს, არ თხრის მის ზედაპირს ციგურებით. დასრიალებს და დაცურავს.

მაგრამ თუკი რამე აკლია, აკლია იმიტომ, რომ შემოქმედებითობას, სიახლეს, გაბედულებას მოკლებულ „რუსულ სივრცეში“ ვარჯიშობს (საბჭოთა ტრადიციებით). მას ახლა სჭირდება სხვა ქვეყანაში ჰაერის გამოცვლა და საკუთარი შესაძლებლობების უკეთ გამოყენება.

ასეთი ქვეყანა არ იყო რუსეთი, სადაც გუბანოვა ახლოსაც არ გაიკარეს „ბროლის ბავშვებმა“. ასეთი ქვეყანა არც საქართველოა, სადაც ამდენი წელია არც ოლიმპიური სტანდარტების ყინულის მოედანი გაკეთდა და ვერც საერთაშორისო დონის მწვრთნელების გუნდი შეიკრა.

საქართველოს ფიგურული სრიალის ფედერაციამ 2 წლის წინ აბსოლუტურად სწორი არჩევანი გააკეთა ამ გოგონაზე, რომელიც გახდა საქართველოს მოქალაქე და ოლიმპიადაზეც გამოვიდა.

აბსოლუტურად სწორად მოიქცა, როცა გამონახა თანხები მისი მწვრთნელისთვის, ქორეოგრაფისთვის, შეჯიბრებებზე გამგზავრებისთვის.

გუბანოვას გამარჯვება სტიმული შეიძლება გახდეს ქართველი გოგონებისა და ბიჭებისთვის, და რაც მთავარია, საქართველოს ხელისუფლებისთვის, რომელმაც ნასტიას გამარჯვება მიულოცა.

ნასტია გუბანოვა 2 წელია საქართველოს მოქალაქეა.

როგორც ამბობს, „უყვარს ქართული კულტურა, არქიტექტურა, ქართული კერძები“... მაგრამ ჯერჯერობით მხოლოდ „მადლობა“ იცის და არ ვარ დარწმუნებული, რომ თავის პირველ სამშობლოს ოკუპანტ ქვეყნად აღიარებს",- აცხადებს გვახარია.

წყარო: რადიო თავისუფლება