"საყოველთაო მობილიზაციის გამოცხადების შემდეგ, მოსკოვიდან დანიშნულ დღევანდელ რეისებზე ყველა ბილეთი გაყიდულია" - მედია

მოსკოვიდან მინსკის, ერევნისა და სტამბოლის მიმართულებით პირდაპირ ფრენებზე დღეს ბილეთები აღარ იძებნება.

ინფორმაციას ბელორუსული გამოცემა Nexta ავრცელებს.

"აეროფლოტისა“ და ავიაბილეთების ონლაინ მაღაზიის Aviasales.ru-ს ვებსაიტებზე მოსკოვიდან მინსკისა და ერევნის მიმართულებით პირდაპირი ფრენებისთვის ბილეთების შეძენა მხოლოდ მომდევნო დღეებშია შესაძლებელი.

ბილეთები ნაწილობრივი მობილიზაციის გამოცხადების შემდეგ სრულად გაიყიდა", - აღნიშნავს გამოცემა.

დღეს რუსეთის პრეზიდენტმა ვლადიმერ პუტინმა ქვეყანაში ნაწილობრივი მობილიზაცია გამოაცხადა. 

შესაბამის განკარგულებას პუტინმა ხელი უკვე მოაწერა. 

პუტინის ბრძანებულებით, სამხედრო სამსახურს მხოლოდ ის მოქალაქეები დაექვემდებარებიან, რომლებიც რეზერვში არიან და, პირველ რიგში, შეიარაღებულ ძალებში მსახურობდნენ, აქვთ გარკვეული სამხედრო სპეციალობა და შესაბამისი გამოცდილება.

რუსეთის თავდაცვის მინისტრი სერგეი შოიგუ კი აცხადებს, რომ ნაწილობრივი მობილიზაციის ფარგლებში სულ გაწვეული იქნება 300 000 რეზერვისტი.

"დღეს ჩვენ ომში ვართ არა იმდენად უკრაინასთან, რამდენადაც კოლექტიურ დასავლეთთან. სტუდენტების რაიმე მობილიზებაზე საუბარი არ არის, წვევამდელების „სპეცოპერაციაზე“ გაგზავნა შეუძლებელია. ამ ეტაპზე გამოძახებული იქნება 300 ათასი რეზერვისტი. რუსეთს აქვს უზარმაზარი სამობილიზაციო რესურსი, თითქმის 25 მილიონი ადამიანი, 1%-ზე ოდნავ მეტი ექვემდებარება ნაწილობრივ მობილიზაციას", - განაცხადა შოიგუმ.

ასევე დაგაინტერესებთ:

* დღეიდან რუსეთში ნაწილობრივი მობილიზაცია დაიწყება - პუტინი