200-ევროიან დახმარებას მიიღებს ყველა დასაქმებული, უმუშევარი, პენსიონერი, მათ შორის ოჯახში მომუშავე პირები (Golf, Badanti) და თვითდასაქმებული ადამიანები, რომლებიც ამ მთავარ კრიტერიუმს აკმაყოფილებს

იტალიის მთავრობის მიერ 200 ევროს ოდენობით ერთჯერადი დახმარების გაცემის თაობაზე, ჩვენ ამბის გაჟღერებისთანავე დავწერეთ, თუმცა ბევრი დეტალის შესახებ ეტაპობრივად ხდება ცნობილი და ვეცდებით სიახლეები დაწვრილებით გაგაცნოთ.

ერთადერთი მთავარი და სავალდებულო მოთხოვნა 200 ევროს ერთჯერადად მიღებისა არის, რომ თქვენი შემოსავლები წელიწადში არ უნდა აღემატებოდეს 35 000 ევროს.

დახმარებას მიიღებს ყველა პენსიონერი, უმუშევარი, დასაქმებული, მათ შორის ოჯახში მომუშავე პირები (Golf, Badanti) და თვითდასაქმებული ადამიანები, რომლებიც ამ მთავარ კრიტერიუმს აკმაყოფილებს.

ასევე ცნობილია, რომ პენსიონერ, დასაქმებულ და უმუშევარ ადამიანებს აღნიშნული თანხა ივლისის თვეში პირდაპირ საკუთარ საბანკო ანგარიშებზე დაერიცხებათ. უფრო დეტალურად კი, პენსიონერები მიიღებენ თანხის გასანაღდებელ სოციალურ ბარათთან ერთად ივლისის პირველ დღეებში, როგორც ჩვეულებრივ ერიცხებათ ხოლმე საპენსიო თანხა.

უმუშევარი ადამიანები, მათ შორის, ისინიც ვინც სარგებლობენ სოციალური დახმარებით ,,Reditto di Citadinanza" ერთჯერად დახმარებას 200 ევროს ოდენობით მიიღებენ პირდაპირ Inps-დან (სოციალური დახმარების ეროვნული ინსტიტუტიდან) და ამ შემთხვევაში კონკრეტული თარიღი ფულადი დახმარების გაცემის თაობაზე არ არის გარკვეული, თუმცა ვარაუდობენ ივლისის თვეს.

რაც შეეხება დასაქმებული ადამიანების კატეგორიას, 200 ევრო მათთან პირდაპირ სახელფასო ფურცელზე ავტომატურად დაირიცხება იმავე თვეში, როგორც სხვებთან, მაგრამ დამოკიდებულია ცალკეულ კომპანიებზე (დამსაქმებელზე) სადაც ისინი მუშაობენ. შესაბამისად, ყველასთვის ერთი და იგივე რიცხვი ვერ იქნება თანხის დარიცხვის დრო.

თვითდასაქმებულთა ირგვლივ კვლავ გაურკვევლობაა. დღეიდან ცნობილია, რომ სპეციალური ფონდი შეიქმნება და დეტალები განკარგულებით განისაზღვრება. სავარაუდოდ, თანხის დარიცხვა, მათთვისაც ივლისის თვეში მოხდება.

თემის დიდი ინტერესიდან გამომდინარე, ჩვენ ყურადღებით ვადევნებთ თვალს როგორ განვითარდება მოვლენები, რა ცვლილებები შევა და აუცილებლად მოგაწვდით დამატებით, სრულყოფილ ინფორმაციას.

წყარო: stranieriinitalia.it

ნონა გედენიძე სპეციალურად ExclusiveTV-თვის რეჯო-ემილიადან

აგრეთვე დაგაინტერესებთ:

📌 “სანატორია 2020” - რა ეტაპზეა განაცხადების განხილვა

📌 2021 წელს იტალიიდან რეკორდული, 7,7 მლრდ-ის ფულადი გზავნილები გავიდა - რომელი ქვეყნიდან შედის საქართველოში ყველაზე “დიდი ფული”?!

📌 იტალია: დამატებით 110 მილიონი ევრო, უკრაინელი ლტოლვილების მისაღებად