"არავინ მოგატყუოთ, ქრისტეს მოძღვრება არსად და არასდროს არ მოუწოდებს ქალებს კაცების უპირობო მორჩილებისკენ - ქალის მკვლელ კაცებს უნდა დაედოთ უმძიმესი სასჯელი და ისინი განდევნილნი უნდა იქნან ეკლესიიდან"

გერმანიაში მოღვაწე სასულიერო პირი თამაზ ლომიძე სოციალურ ქსელში საქართველოში ფემიციდის გახშირებულ ფაქტებს ეხმაურება და წერს:

"არავინ მოგატყუოთ, ქრისტეს მოძღვრება არსად და არასდროს არ მოუწოდებს ქალებს კაცების უპირობო მორჩილებისკენ.

არ იცნობს ასეთ მცნებას ქრისტიანობა.

ქრისტიანმა ქალმა შეიძლება აღიაროს მორწმუნე კაცი ოჯახის თავად, პატივი სცეს და დაემორჩილოს მას, თუ კაცი მთელი მისი არსებით, მთელი ფიქრით და მთელი ცხოვრებით ცდილობს ემსახუროს, დაიცვას და შეუმსუბუქოს მის ქალს ცხოვრება.

უფრო მეტიც, თუ კაცი არ არის მზად ქრისტეს მსგავსად სიცოცხლე გაწიროს მეუღლისთვის, არც ქალი არ არის ვალდებული დაემორჩილოს ასეთ კაცს.

ქრისტიანობაში არ არსებობს ქალის უპირობო მორჩილება.

აუცილებელი წინაპირობაა კაცისგან ყოველდღიური თავის გაწირვა მისი ცოლისთვის.

გახსოვთ, ადრე, შავბნელ წლებში საქართველოს ეკლესიამ გამოაცხადა შავი წიგნის შექმნის შესახებ, სადაც ყველა მკვლელის სახელი სამარცხვინოდ, მომავალი თაობების დასანახად ჩაიწერებოდა. 

ახლა არის დრო (დაგვიანებულიცაა), როცა საქართველოს მართლმადიდებელმა ეკლესიამ ხმამაღლა, მთელი ქვეყნის გასაგონად, ყველა სამრევლოს, ყველა ქალაქის და სოფლის გასაგონად, უნდა გამოაცხადოს უმკაცრესი სასჯელი ქალებზე მოძალადე და ქალების მკვლელი კაცებისთვის.

ასეთ კაცებს უნდა დაედოთ უმძიმესი საეკლესიო სასჯელი და ისინი განდევნილნი უნდა იქნან ეკლესიიდან.

ამ სასჯელის შესახებ ცნობილი უნდა გახდეს მთელი ქვეყნისთვის.

ასეთი სასტიკი, დაუნდობელი და ჯალათი კაცების ადგილი არ არის ქრისტეს ეკლესიაში.  

კაცი რომელიც ცოცხლად დაწვამს ყოფილ ცოლს, რატომ უნდა იყოს ქრისტეს ეკლესიის წევრი?",- წერს სასულიერო პირი.

ამავე თემაზე:

* „საქართველოში ქალთა სასაკლაოა - არამარტო ქალთა“ - ემიგრანტი აქტივისტები ფემიციდის წინააღმდეგ აქციას გამართავენ

* კაცი, რომელმაც თერჯოლაში ყოფილი ცოლი დაწვა, კლინიკაში გარდაიცვალა