ექიმის ინფორმაციით, საგარეჯოში სროლისას დაჭრილი, კრიტიკულ მდგომარეობაში მყოფი პაციენტის მდგომარეობა შედარებით დასტაბილურდა

საგარეჯოს „ჯეო ჰოსპიტალსის“ კლინიკის ექიმის, მამუკა ოთიაშვილის განცხადებით, საგარეჯოში სროლისას დაჭრილი, კრიტიკულ მდგომარეობაში მყოფი პაციენტის მდგომარეობა შედარებით დასტაბილურდა.

„3 ავადმყოფი განაგრძობს მკურნალობას, ორი მათგანის მდგომარეობა დამაკმაყოფილებელია. კრიტიკულ მდგომარეობაში რეანიმაციულ განყოფილებაში მყოფი პაციენტის მდგომარეობა შედარებით დასტაბილურდა. თუმცა ის რჩება რეანიმაციულ განყოფილებაში, მართვით სუნთქვაზე.

აქვს მუცლის ღრუს გამჭოლი ცეცხლსასროლი ჭრილობები აქვს, ბარძაყის, დაზიანებული იყო დიდი კალიბრის სისხლძარღვები, ბარძაყის არტერია, ვენა, მუცლის ღრუში ორგანოების დაზიანება იყო და მრავლობითი სისხლჩაქცევა. ჯერჯერობით სამივე პაციენტის მდგომარეობა საყურადღებოა და საჭიროებს კლინიკაში მკურნალობის გაგრძელებას“, - აცხადებს მამუკა ოთიაშვილი.

საგარეჯოში, ერთ-ერთი კორპუსიდან უცნობმა პირმა ცეცხლი გვიან ღამით გახსნა. ბოლო ინფორმაციით, სროლის შედეგად დაიღუპა ხუთი ადამიანი, ხოლო დაჭრილია ხუთი პირი. შსს-ს ცნობით, შემთხვევის ადგილზე სპეცდანიშნულების რაზმის მისვლისთანავე ბრალდებულმა ცეცხლსასროლი იარაღიდან გასროლით, სავარაუდოდ, თვითლიკვიდაცია განახორციელა.

ამასთან, სროლის შედეგად დაჭრილი სამი პირი საგარეჯოს „ჯეო ჰოსპიტალში“ მკურნალობს. ერთი დაშავებული კლინიკიდან უკვე გაწერეს, ორის მდგომარეობა სტაბილურია, ერთის კი – კრიტიკულად მძიმე, ის რეანიმაციულ განყოფილებაშია მოთავსებული. კიდევ ერთ დაშავებულს, რომელსაც თვალის ტრავმა აღენიშნებოდა და საგარეჯოდან „კავკასიის მედიცინის ცენტრში“ გადაიყვანეს, ოპერაცია ჩაუტარდა. ექიმების განცხადებით, პაციენტის მდგომარეობა დამაკმაყოფილებელია და მის სიცოცხლეს საფრთხე არ ემუქრება.

ამავე თემაზე:

* საგარეჯოში მომხდარი თავდასხმის შედეგად დაჭრილებისთვის პარაკლისი, გარდაცვლილთა სულებისთვის კი პანაშვიდი შესრულდა