ნაცმოძრაობა "ოკუპირებული ტერიტორიების შესახებ" კანონის გამკაცრების საკანონმდებლო ინიციატივით გამოდის

ოპოზიციური პოლიტიკური პარტია "ერთიანი ნაციონალური მოძრაობა", "ოკუპირებული ტერიტორიების შესახებ" კანონის გამკაცრების საკანონმდებლო ინიციატივით გამოდის.

ინფორმაციას 1tv-ge ავრცელებს.

საინფორმაციო სააგენტოს ცნობით, ცვლილებების მიხედვით, პირებს, რომლებიც რაიმე ფორმით მონაწილეობდნენ ან დღემდე მონაწილეობენ საქართველოსა და უკრაინის ტერიტორიების ოკუპაციასა და სამხედრო აგრესიაში, საქართველოში შემოსვლა და ეკონომიკური აქტივობების განხორციელება აეკრძალებათ.

ცვლილებებით, დღეს მოქმედი კანონით დადგენილი შეზღუდვები ყველა იმ ფიზიკურ და იურიდიულ პირზე უნდა გავრცელდეს, რომელთა მხრიდანაც საქართველოს და უკრაინის ტერიტორიების ოკუპაცია და სამხედრო აგრესია ხორციელდება.

ამასთან, პროექტით, ყველა იმ ფიზიკურ და იურიდიულ პირს, რომლებსაც კანონი აქვთ დარღვეული, ეკრძალებათ საქართველოს ტერიტორიაზე ნებისმიერი ეკონომიკური (სამეწარმეო ან არასამეწარმეო) საქმიანობა, მიუხედავად იმისა, ხორციელდება თუ არა იგი მოგების, შემოსავლის ან კომპენსაციის მისაღებად. ასევე, საქართველოში მოქმედ ყველა სახის იურიდიულ პირს ეკრძალება დაფინანსების მიღება პირდაპირ ან ირიბად ყველა იმ ფიზიკური და იურიდიული პირის მხრიდან, რომლებსაც აღნიშნული კანონი აქვს დარღვეული.

ზემოთ აღნიშნულია გარდა, ცვლილებებით, უცხო ქვეყნის მოქალაქეებსა და მოქალაქეობის არმქონე პირებს, რომლებსაც აღნიშნული კანონი აქვთ დარღვეული, საქართველოში შემოსვლა ეკრძალებათ.

ასევე დაგაინტერესებთ:

* "ხერსონში, 58 ობოლი და შშმ ბავშვი, ერთ თვეზე მეტია, ადგილობრივი ეკლესიის სარდაფში იმალება" - უკრაინის ომბუდსმენი

* "რუსებმა ვერც მეორე ფაზა დაიწყეს ისე, როგორც ეს მათ სურდათ, პრაქტიკულად ვერცერთ მიმართულებაზე ვერ შეძლეს მნიშვნელოვანი და მასშტაბური გარღვევის განხორციელება, თუმცა აქვთ გარკვეული მცირე წინსვლები"