როგორ მოხვდა ბერბერული მაკაკა საზოგადოებრივი მაუწყებლის ეზოში? - "სინამდვილეში მამათა და შვილთა ბრძოლის კლასიკური სცენა გათამაშდა და დაჩაგრულმა უმცროსმა დაჰკრა ფეხი და სახლიდან გაიქცა"

თბილისის ზოოპარკის ადმინისტრაცია სოციალურ ქსელში წერს:

"ალბათ ბევრმა გაიგეთ და ფოტოებიც ნახეთ, ორიოდ დღის წინ ჩვენი ბერბერული მაკაკა საზოგადოებრივი მაუწყებლის ბუფეტში რომ წაბრძანდა საუზმეზე.

სხვათა შორის, უნდა აღინიშნოს, რომ ტელევიზიაში ყველას გაუხარდა დილის მოულოდნელი სტუმრის დანახვა და ჯოხებითა და ქვებით არავინ გამოჰკიდებია. პირიქით, ბანანზეც კი დაუპატიჟებიათ...

ახლა, რაც მოხდა, იმაზე.

ჩვენი ბერბერული მაკაკების ვოლიერში მამათა და შვილთა ბრძოლის კლასიკური სცენა გათამაშდა.

ახალი თაობა მოიზარდა და მოყოყლოჩინდა, ძველი თაობა ჯერ კიდევ ყოჩაღობს და პოზიციებს არ თმობს.

არ ვიცით, მდედრების ნიადაგზე მოხდა შეტაკება (გაგანია გამრავლების პერიოდი აქვთ ახლა), თუ ეზო-კარის განაწილებაზე, მაგრამ იმ დილით ეს ყმაწვილი და ზრდასრული, კუნთმაგარი მამრი წაკინკლავდნენ.

არა, წაკინკლავდნენ რბილად ნათქვამია, იჩხუბეს და კარგა გემრიელი მუშტი-კრივი გამართეს. ჩხუბში უფროსმა იმარჯვა და დაჩაგრულმა უმცროსმა რა ქნა? დაჰკრა ფეხი და სახლიდან გაიქცა.

საერთოდ, მაკაკების სახლიდან გაქცევა არაა ადვილი საქმე.

ვოლიერი მათი სახეობისთვის შესაბამისი სტანდარტით არის შემოსაზღვრული - წყლიანი თხრილი, ელექტროღობეები, ბარიერის სიმაღლე - ყველაფერი იმგვარადაა მოწყობილი, რომ მაკაკამ სივრცის დატოვება ვერ მოახერხოს, მაგრამ როგორც სხვა ქვეყნების ზოოპარკების გამოცდილებაც გვიჩვენებს, ხანდახან, შიშის, ან სტრესის პირობებში, ცხოველს მისთვის უჩვეულო ქცევების გამოვლენა შეუძლია.

ჰო, ლოგიკური კითხვა იბადება აქ: ხომ შეიძლება, ლომმაც გამოავლინოს უჩვეულო ქცევა? დიახ, შეიძლება, მაგრამ განსაკუთრებით სახიფათო ცხოველების შემთხვევაში ვოლიერის კონსტრუქციის სტანდარტებიც განსაკუთრებით და მეტიც - უკიდურესად მკაცრია.

გაქცეული ვაჟბატონი მალევე მშვიდობით მოვაბრუნეთ უკან და ახლა მეტოქეებისგან განცალკევებით გვყავს მოთავსებული", - აღნიშნულია თბილისის ზოოპარკის მიერ სოციალურ ქსელში გავრცელებულ ინფორმაციაში.

ასევე დაგაინტერესებთ:

* "12 წლის გოგო რომ დაორსულდება, მანდ სახელმწიფოს კი, არა მაგის მშობლებს უნდა მოუ@@ნა პატრონი, პოლიტიკის ბრალიაო - რა არის პოლიტიკის ბრალი? 24 საათი ტიკტოკზე და პორნო საიტებზე რომ ყრიან"

* „არცერთი აღარაა ცოცხალი, ერთად წვანან მათ სახლს შემოკრულ ტყეში“ - აკა სინჯიკაშვილი ემოციურ ისტორიას აქვეყნებს