სააკაშვილი გირგვლიანის საქმეზე: ვნანობ, რომ მაშინდელი შს მინისტრი არ გავათავისუფლე

პატიმრობაში მყოფმა საქართველოს ყოფილმა პრეზიდენტმა მიხეილ სააკაშვილმა გერმანულ გამოცემა „შპიგელთან" ინტერვიუში შეაფასა საკუთარი მმართველობა.

როგორც მან თქვა, ნანობს, რომ სანდრო გირგვლიანის საქმის გამო იმდროინდელი შინაგან საქმეთა მინისტრი ვანო მერაბიშვილი თანამდებობიდან არ გაათავისუფლა.

„2004 წელს საქართველო არშემდგარი სახელმწიფო იყო, სადაც ინსტიტუტები არ ფუნქციონირებდა. მაგრამ ჩემი პრეზიდენტობის დროს მთლიანი შიდა პროდუქტი ოთხჯერ გაიზარდა, კორუფცია თითქმის მთლიანად გაქრა და ჩვენ დავიწყეთ ევროინტეგრაცია. რა თქმა უნდა, იყო სამწუხარო ინციდენტებიც, როგორიცაა ბანკირ სანდრო გირგვლიანის შემთხვევა, და რომელიც მიკერძოებულად შუქდებოდა. რეტროსპექტივაში, ვნანობ, რომ მაშინდელი შინაგან საქმეთა მინისტრი თანამდებობიდან არ გავათავისუფლე”, - თქვა სააკაშვილმა.

ყოფილმა შინაგან საქმეთა მინისტრმა ვანო მერაბიშვილმა სასჯელის მოხდის შემდეგ, „მთავარი არხის" გენერალურ დირექტორთან ნიკა გვარამიასთან ინტერვიუში განაცხადა, რომ გირგვლიანის საქმის გამო უნდა გადამდგარიყო.

„მე ვთვლი, რომ მე უნდა ვყოფილიყავი უფრო მტკიცე და უნდა მიმეღო თამამი გადაწყვეტილება თავის დროზე. როგორც მინიმუმ, უნდა ამეღო პოლიტიკური პასუხისმგებლობა და გადავმდგარიყავი... მინდა გითხრათ, რომ ეს საკითხი იხილებოდა, მათ შორის ჩემ მიერაც. ეს საკითხი იხილებოდა. ის [სააკაშვილი] იხილავდა და რამდენიმე ადამიანი, პოლიტიკური ხელმძღვანელობა. სხვადასხვა დროს იყო სხვადასხვა მოსაზრებები, მაგრამ ეს საკითხი გადაწყდა, როგორც გადაწყდა", - თქვა ვანო მერაბიშვილმა 2020 წლის აპრილში.

გირგვლიანის საქმე

2018 წლის 5 იანვარს, საქართველოს ექსპრეზიდენტს, მიხეილ სააკაშვილს, დაუსწრებლად 3 წლით პატიმრობა მიუსაჯეს.

მიხეილ სააკაშვილი დამნაშავედ ცნეს სამსახურებრივი უფლებამოსილების ბოროტად გამოყენებაში, რაც სისხლის სამართლის კოდექსის 332-ე მუხლის მეორე ნაწილის დარღვევას გულისხმობს.

გამოძიების მიხედვით, 2006 წლის 27 იანვარს, თბილისში, კაფე შარდენ ბარში თამარ მერაბიშვილს (სალაყაია), დავით ახალაიას, ოლეგ მელნიკოვს, გურამ დონაძეს და სხვებს, სანდრო გირგვლიანთან და მის მეგობარ ლევან ბუხაიძესთან მოუხდათ შელაპარაკება. შურისძიების მიზნით, დავით ახალაიას დავალებით, კონსტიტუციური უსაფრთხოების დეპარტამენტის თანამშრომლებმა სანდრო გირგვლიანი და ლევან ბუხაიძე გაიტაცეს ქალაქგარეთ, ოქროყანის სასაფლაოზე და ასევე, დავით ახალაიას დავალებით, უმოწყალოდ სცემეს და აწამეს. ამ საქმეზე, 2006 წელს კონსტიტუციური უსაფრთხოების დეპარტამენტის თანამშრომლები გასამართლდნენ. ისინი სასჯელაღსრულების N10 დაწესებულებაში, კომფორტულ და პრივილეგირებულ მდგომარეობაში იყვნენ სასჯელის მოხდის პერიოდში, საპატიმრო დაწესებულებას ტოვებდნენ ყოველგვარი დოკუმენტაციის და ნებართვის გარეშე. 2008 წელს ისინი პრეზიდენტმა მიხეილ სააკაშვილმა წინასწარი შეთანხმებით შეიწყალა.

ამ საქმეზე განაჩენი თბილისის საქალაქო სასამართლოს მოსამართლე გიორგი არევაძემ გამოიტანა. ის დღეს მიხეილ სააკაშვილის სასჯელის გადავადების ან მისგან გათავისუფლების საქმეს განიხილავს.

ასევე დაგაინტერესებთ:

* სააკაშვილი: დედაჩემმა მემკვიდრეობით მიღებული მიწა გაყიდა და მიუხედავად ამისა, ახლა ფული აღარ გვაქვს, არც ადვოკატების და არც სხვა რამის

* იერუსალიმში კიდევ ერთი თავდასხმა მოხდა, დაშავებულია ორი ადამიანი

* ზურაბ ჩხაიძე: სააკაშვილმა შეამცირა საკვების მიღება, შევთავაზეთ ინკლუზიური თერაპია, რაზედაც კატეგორიული უარი განაცხადა, თუ ასე გაგრძელდება, მისი მდგომარეობა დამძიმდება