"ვლოცულობთ მარიტა-მარიამისთვის" - პატრიარქის სამძიმარი, ტრაგიკულად დაღუპული 13 წლის მოზარდის ოჯახს

სრულიად საქართველოს კათოლიკოს-პატრიარქ ილია II, 
მარიამ (მარიტა) მეფარიშვილის გარდაცვალებასთან დაკავშირებით სამძიმრის წერილს ავრცელებს, რომელსაც საპატრიარქოს პრესცენტრი აქვეყნებს :

"მარიამ (მარიტა) მეფარიშვილის მშობლებსა და ახლობლებს

ბატონო დავით, ქალბატონო ანა,

დიდია ჩვენი გულისტკივილი დღეს მომხდარი ტრაგედიის გამო.

აღვავლენთ ლოცვებს პატარა მარიტა-მარიამის უკვდავი, ნათელი სულისათვის, რათა უფალმან თვის საუფლოში, - სავანესა მართალთასა დააწესოს იგი, ხოლო თქვენ მოგმადლოთ ჭირსა შიგან სიმტკიცე და ურყევი რწმენა იმისა, რომ სინამდვილეში სიკვდილი არ არსებობს, რადგან გარდაცვალება არის დასაწყისი ახალი, მარადიული, ჭეშმარიტი ცხოვრებისა, რომელიც მხოლოდ დროებით განგვაშორებს ახლობლებს;

მთავარია, ჩვენ შევძლოთ ღვთის გზით სვლა.

ვლოცულობთ მარიტა-მარიამისთვის.

ღმერთი იყოს თქვენი შემწე.

პატივისცემით,

⛪ ილია II, სრულიად საქართველოს კათოლიკოს-პატრიარქი",- აღნიშნულია სამძიმრის წერილში.

გუშინ, 13 ოქტომბერს, ვაკის პარკის შადრევანში ჩასულ ბავშვებს დენმა დაარტყა, რასაც 13 წლის გოგონა ემსხვერპლა. ექიმის განცხადებით, დაშავებულებიდან ერთის მდგომარეობა დასტაბილურდა და გადაყვანილია პედიატრიულ განყოფილებაში. გავრცელებული ინფორმაციით, ბავშვებს შადრევანში ბურთი ჩაუვარდათ, ბურთის ამოღებისას კი დენმა დაარტყათ.

შსს-ს ცნობით, მომხდარზე გამოძიება სისხლის სამართლის კოდექსი 240-ე პრიმა მუხლითაა დაწყებული, რაც ელექტრო – ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს.

ასევე დაგაინტერესებთ:

* "ამ კაცის დამსახურებაა იმ ორი ბავშვის გადარჩენა. რამდენჯერაც წყალში ჩავიდა, იმდენჯერ დენი არტყამდა, მაგრამ მაინც ამოიყვანა..." - მაცაცო კევლიშვილის ინფორმაციით ორი მოზარდი მებაღემ გადაარჩინა