თურქეთსა და სირიაში დაღუპულთა რაოდენობამ 2 300-ს გადააჭარბა

თურქეთში დამანგრეველი მიწისძვრების შემდეგ მაშველები ნანგრევებში მოყოლილ ადამიანებს ამ დრომდე ეძებენ. უსახლკაროდ დარჩენილების ნაწილი ღია ცის ქვეშაა. 

თურქეთსა და სირიაში დამანგრეველი მიწისძვრის შედეგად დაღუპულთა რაოდენობამ 2 300-ს გადააჭარბა.

ბოლო მონაცემებით, თურქეთში ამ დროისთვის დასტურდება 1500–მდე ადამიანის დაღუპვა, 430–ის სირიის მთავრობის მიერ კონტროლირებად ტერიტორიაზე, 380-ზე მეტი კი, მეამბოხეების მიერ კონტროლირებადზე.

დაღუპულთა შორისაა საქართველოს ორი მოქალაქე.

ამასთან, მზარდია დაშავებულთა რაოდენობაც. ბოლო ცნობებით, ეს რიცხვი თურქეთში 7 600-ს აღწევს, ასადის მიერ კონტროლირებად ტერიტორიაზე კი 1 300-ს.

დამანგრეველი მიწისძვრა თურქეთის სამხრეთ-აღმოსავლეთ ნაწილში 6 თებერვალს, ადგილობრივი დროით დაახლოებით 04:00 საათზე მოხდა.

სიმძლავრემ 7,8 მაგნიტუდა შეადგინა.

მას მოჰყვა განმეორებითი ბიძგები, თუმცა შუადღისას 7,5 მაგნიტუდის სიმძლავრის მიწისძვრა ქვეყნის ცენტრალურ ნაწილში დაფიქსირდა.

ვარაუდობენ, რომ მონაცემები მნიშვნელოვნად გაიზრდება, რადგან ნანგრევებს ქვეშ ჯერ კიდევ რჩებიან ადამიანები, კლიმატური პირობები ართულებს უწყვეტად მიმდინარე სამუშაოებს, ამასთან, დღეს თურქეთში ყინვას პროგნოზირებენ, რაც კიდევ უფრო ამძიმებს ნანგრევებს ქვეშ მოყოლილი ადამიანების მდგომარეობას.

ქვეყნის პრეზიდენტის თქმით, დახმარებისთვის მზაობა 45–მა ქვეყანამ, ევროკავშირმა და ნატომ გამოხატა, მათ შორისაა საქართველო. ქართველ მაშველთა ჯგუფი ტექნიკასთან ერთად გაემგზავრა თურქეთისკენ.

ასევე დაგაინტერესებთ:

* გიორგი ჯანჯღავა: ძალიან სასიხარულოა, რომ საქართველო აღმოჩნდა ერთ-ერთი პირველი, ვინც დახმარების ხელი გამოუწოდა თურქეთს

* "ერთიანობის დროა - შემიძლია ორი ოჯახი მივიღო სტიქიის ზონიდან" - თურქეთში მოქალაქეები ღია ცის ქვეშ დარჩენილებს, თავშესაფრად, საკუთარ სახლებს სთავაზობენ

* "ყურადღება! ყურადღება!!! ვინც ხართ თურქეთში - სტიქიის ზონაში მოქმედებს საელჩოს ცხელი ხაზი"

* საგარეო უწყება: მიწისძვრის შედეგად საქართველოს კიდევ ერთი მოქალაქე დაიღუპა