„ბებოს გული ცხოვრების უკუღმართობით და გაურკვევლობით აერია, ვერ გარკვეულიყო ამერიკა ჯობია, რუსეთი, თუ ვინ უნდა მოიგოს ომი“ - ავტობუსში მოსმენილი სევდიანი ამბები

„გამიჩერე ნენა ავტობუსი, რაცხა გული მერევა. - ცრემლები ჩამიდგა თვალებში, ბებოს, გული ცხოვრების უკუღმართობით და გაურკვევლობით აერია, ვერ გარკვეულიყო ამერიკა ჯობია, რუსეთი, თუ ვინ უნდა მოიგოს ომი“, - exclusivetv.ge-ს მაკა ღლონტმა საინტერესო ისტორია მოწერა. მაკა თბილისში ცხოვრობს და ახლა  ოზურგეთიდან  ავტობუსით დედაქალაქში ბრუნდება. 

„საინტერესოა მგზავრობა, აქ ყველაზე მეტად გაიგებ ადამიანების წუხილებს: და მეტად საინტერესოა თუ მარშრუტი გრძელია.

ასვლისთანავე, რამდენიმე ნაცნობი შემხვდა მისალმება საკმაოდ თბილი და სევდიანი იყო, დღეს სითბო სევდის გარეშე ვეღარ არსებობს, დაიწყო ყურმოკრული ისტორიების აკინძვა, ვერ მოვითმინე და მინდა გაგიზიაროთ, არა როგორც რიგითმა, არამედ რიგითების თანამედროვე მემატიანემ.

ჩემმა შვილმა გრანტი მოიპოვა და ამერიკის ერთ-ერთ შტატში სტუდენტი მაგისტრანტია, - ჰყვება დედა, სითბონარევი სევდით, როცა ვსაუბრობთ ყოველთვის თემა მთავრდება, დე მხოლოდ სამი დღით მინდა ჩემი დაპატარავებული საქართველო ჩავსვა აქ ჩემს ქალაქში და ადამიანებმა ნახონ:

რა არის თავისუფლება, თანადგომა, განათლების სისტემა, ბედნიერება, მეგობრობა და სიცოცხლე (გარყვნილ ამერიკაში).

აქ არ არსებობს სევდანარევი სითბო, აქ ყველაფერი თბილია და ქალს, დედას ცრემლები ჩამოცვივდა, სხვებმაც გაიგონა ისტორია და ჩვენ რად გვინდა ძამა ამერიკა, აგერ რუსეთი გავხდებით მალე და ყოლიფერ კას მაგენისგან ვისწავლითო.  ფეხს ვერ გაადგამ ვერსა, ყველგან მაგენია, გაწიწმატდა გურული ქალი, რომელსაც სტუდენტი ბაღნებიზა შემოდგმის ჭირნახული მიჰქონდა (რომელიც წრულს მეიხრუკა და მეისპოო) ხო მაი ამინდიც რუსების შემოთრეულია, მაგ ომმა ქნა ყოლიფერი, იქანე აფეთქებენ, და აქანე ქე ვართ აფეთქებულებიო. ერთი მაგენის (უკრაინელების) გამარჯვება მანახა და იმ დღესვე ამომშპეს სულიო ამბობს თავწაკრული ძალიან საყვარელი ბებო.

მე კი წავედი ფიქრებში, სად დაეტევა ამდენი რუსი, რა ბედნიერია ის დედა, რომლის შვილი გარყვნილ ამერიკაში ბედნიერია, რა იქნება ხვალ და ზეგ  და რა მშვიდია ჩვენი მძღოლი, რომელსაც არ ჩაურთავს ბოლო ხმაზე არც "რუსკი" და  ინგლისკი მუსიკები, საფიქრალი აქვს, რამდენი მგზავრი ჰყავს და ეყოფა თუ არა დღევანდელი შემოსული თანხა, შვილების საჭმლიზა, გადასახადებიზა, ერთი ბოთლი პივიზა და ხვალ უკანა გზის ბენზინიზა, თითქოს ვიღაცამ ფიქრი წაიკითხა და იყვირა როდემდე უნდა გეიზარდოს აი ფასები, დოლარი და ევრო კი ეცემა, მარა ჩვენ კი ვართ ყველა დაცემულებიო და ახარხარდა მგზავრები, დაავიწყდათ ყველას სევდა რომ უნდა გვხლებოდა ერთ-ერთ თანამგზავრად და ამ დროს ბებომ იკნავლა , გამიჩერე ნენა ავტობუსი, რაცხა გული მერევაო, ცრემლები ჩამიდგა ბებოს გული ცხოვრების უკუღმართობით და გაურკვევლობით აერია, ვერ გარკვეულიყო ამერიკა ჯობია, რუსეთი, თუ ვინ უნდა მოიგოს ომი“, - მოგვწერა მაკა ღლონტმა.

ასევე დაგაინტერესებთ:

🔵 „ჯერ საკუთარი ქმარი და შემდეგ იძულებით ჩემი შვილები გავამწესე ემიგრაციაში“ - exclusivetv.ge ემიგრაციაში მყოფი წარმატებული ახალგაზრდების დედამ სევდიანი ისტორია უამბო

🔵 „საკუთარმა შვილებმა იძულებით ემიგრაციაში გამამწესეს და როგორც ნივთი ჩამდეს თვითმფრინავში“ - ემიგრანტის უმძიმესი ისტორია

🔵 „ჩავაღწიე პოლონეთში, სადაც ვითომ ახლობელი უნდა დამხვედროდა... მოტყუებული აღმოვჩნდი... ჩამოვჯექი ბორდიურზე და ამიტყდა ისტერიული ტირილი“ - ემიგრანტის მძიმე ისტორია