"დღეს კახა კალაძეც ჭირისუფალია! და არა - დამნაშავე! თითქოს რაღაც უნდა ესწავლებინა გასულ წლებს ჩვენთვის, მაგრამ ვერა" - ბონდო მძინარაშვილი

ჟურნალისტი, პირველი არხის სამეურვეო საბჭოს წევრი ბონდო მძინარაშვილი, სოციალურ ქსელ ფეისბუკში წერს:

"მე ვიცნობ კახა კალაძეს - ოთხი შვილის მამას!

უფროსები დაახლოებით იმ ბავშვების ასაკისანი არიან, შადრევანთან რომ იყვნენ ვაკის პარკში.

ასეთი ტრაგედიის დროს ყველა მამას და ყველა დედას საკუთარი შვილები ახსენდება.

და არავინ იცის, ვისი შვილი შეიძლება აღმოჩნდეს იქ და იმ დროს.

არავინ იცის!

ამიტომ არის ყველა მამა და ყველა დედა ჭირისუფალი!

დღეს კახა კალაძეც ჭირისუფალია!

და არა - დამნაშავე!

ამ ტრაგედიამ(აც) ვერ შეგვახსენა, რომ ადამიანები ვართ!

პირიქით, ამ საშინელი ტრაგედიით შეძრულებმა ქვებს წამოვავლეთ ხელი!

და, ყველას გასაოცრად, ეს ქვებიც იქვე აღმოჩნდა!

ვისაც არ შეხვდა, იმან გაუწოდა, ჯიბეები ქვებით რომ ჰქონდა სავსე!

ოღონდ იმ პირობით, რომ უფრო კარგად დაუმიზნებდა!

თითქოს რაღაც უნდა ესწავლებინა გასულ წლებს ჩვენთვის, იმ ადამიანებისთვის, ვის თვალწინაც ბოლო ათწლეულების ყველა საშინელება მოხდა და ვისაც თითოეულმა ტრაგედიამ სასტიკი კვალი დაგვიტოვა!

მაგრამ არა!

ვერა!

ვერაფერიც ვერ ვისწავლეთ და ისევ იმ პირველყოფილმა ინსტინქტმა გვაჯობა!

ქვას წამოვავლეთ ხელი!

ყველას პირველობა გვინდა!

ყველას გვგონია, რომ პირველად ქვის სროლის უფლება სწორედ ჩვენ გვაქვს!
და ვისვრით!

მე არ ვიცი, რა იქნება ხვალ!

მაგრამ მე მეშინია, რომ კახასთვის ნასროლი ქვა მის ოჯახს, მის შვილებს არ მოვარტყათ!

მე ვიცნობ კახა კალაძეს!

გამიკრიტიკებია კიდეც, როცა ამის საფუძველი მქონდა და შემიქია კიდეც, როცა ვხედავდი, როგორ ირჯებოდა!

და ამას საჯაროდ ვაკეთებდი!

პირველად კი 4 წლის წინ დავინახე, რომ კახა კალაძეს "გული ჰქონია"!

ჩვენ ხომ მივეჩვიეთ პოლიტიკოსების უგულობას!

მაშინ, დედა-შვილის, პატარა ბავშვის დაღუპვით შეძრულმა კახა კალაძემ ჟურნალისტებთან კომენტარის დასრულება ვერ შეძლო!

და მე მივხვდი, რომ იმ დედა-შვილის ჭირისუფალი კახა კალაძეც იყო!

ახლაც ასეა, კახა კალაძეც ჭირისუფალია!

და თუ რომელიმე თქვენგანი კახა კალაძეზე მეტად განიცდით პატარა მარიტას გარდაცვალებას, თუ რომელიმე თქვენგანს კახა კალაძეზე მეტად გინდათ მარიტას კლასელების გადარჩენა და გამოჯანმრთელება, კი, ბატონო, აგერ, ქვა, - დასწვდით და ესროლეთ!", - წერს მძინარაშვილი.

გუშინ, 13 ოქტომბერს, ვაკის პარკის შადრევანში ჩასულ ბავშვებს დენმა დაარტყა, რასაც 13 წლის გოგონა ემსხვერპლა. ექიმის განცხადებით, დაშავებულებიდან ერთის მდგომარეობა დასტაბილურდა და გადაყვანილია პედიატრიულ განყოფილებაში. გავრცელებული ინფორმაციით, ბავშვებს შადრევანში ბურთი ჩაუვარდათ, ბურთის ამოღებისას კი დენმა დაარტყათ.

შსს-ს ცნობით, მომხდარზე გამოძიება სისხლის სამართლის კოდექსი 240-ე პრიმა მუხლითაა დაწყებული, რაც ელექტრო – ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს.

ასევე დაგაინტერესებთ:

* "გაუბედურებული ვარ...ყველა აუცილებლად აგებს პასუხს, მათ შორის მეც. თუ მაქვს რაიმე დანაშაული, მზად ვარ, კანონის წინაშე ვაგო პასუხი" - კახა კალაძე

* "ამ კაცის დამსახურებაა იმ ორი ბავშვის გადარჩენა. რამდენჯერაც წყალში ჩავიდა, იმდენჯერ დენი არტყამდა, მაგრამ მაინც ამოიყვანა..." - მაცაცო კევლიშვილის ინფორმაციით ორი მოზარდი მებაღემ გადაარჩინა

* "სააკაშვილს შევარდნაძეს ნუ ადარებთ, - აფხაზეთის ომში შევარდნაძე არსად გაქცეულა და რეალური და არა წარმოსახვითი დაბომბვის დროს გადაეფარა პირადი დაცვა!" - ბონდო მძინარაშვილი