„ნაციონალური მოძრაობის“ მოქმედი პოლიტსაბჭოს წევრების ნაწილი პოლიტიკურ თანამდებობებს ტოვებს

„ნაციონალური მოძრაობის“ მოქმედი პოლიტსაბჭოს წევრების ნაწილი პოლიტიკურ თანამდებობებს ტოვებს, თუმცა ისინი პარტიის წევრებად რჩებიან.

ამის შესახებ ჟურნალისტებთან უკვე ისაუბრეს კობა ნაყოფიამ, აკაკი მინაშვილმა, ბაჩო დოლიძემ, გიორგი პატარაიამ.

მანამდე, აჭარის ორგანიზაციის თავმჯდომარის პოსტი დატოვა გიორგი კირთაძემ.

„აქტიურ პოზიციებზე, პარტიის მართვაში აღარ ვიქნებით. გადაწყვეტილებებს აღარ მივიღებთ. ვიქნებით როგორც წევრები, თუმცა ძალიან ინტენსიურად ჩავერთვებით პარტიის ღონისძიებებში. ახლა წარსულზე ლაპარაკის დრო აღარაა. გვყავს გამარჯვებული გუნდი, გამარჯვებული თავმჯდომარე, ისინი მიიღებენ გადაწყვეტილებებს. ქვეყნისთვის მნიშვნელოვანია ამ პარტიის წარმატება და სააკაშვილის გათავისუფლება“, – განაცხადა აკაკი მინაშვილმა, რომელიც პარტიის პოლიტიკური მდივნის პოსტს იკავებდა.

„ნაციონალური მოძრაობის“ საორგანიზაციო მდივნის, ბაჩო დოლიძის თქმით, პოსტს თმობს იქიდან გამომდინარე, რომ გამარჯვებულ კანდიდატს მენეჯმენტში საკუთარი გუნდის დაკმაყოფილების შესაძლებლობა ჰქონდეს.

„რა თქმა უნდა, ვრჩები პარტიის რიგებში, ვაგრძელებ ბრძოლას იმ რეჟიმთან, რომელსაც ჰქვია „ქართული ოცნება“, – აღნიშნა მან.

თანამდებობა დატოვა ასევე საზოგადოებასთან ურთიერთობის სამსახურის ხელმძღვანელმა გიორგი პატარაიამ.

„რა თქმა უნდა, იმ პარტიაში ვრჩები, რომელშიც მოვედი 2001 წელს. ჩემთვის მნიშვნელოვანია ეს პარტია, ვუსურვებ გამარჯვებულ კანდიდატს წარმატებას“, – თქვა მან. 

„ნაციონალური მოძრაობის“ მოქმედი პოლიტსაბჭოს თავმჯდომარის, კობა ნაყოფიას განცხადებით, ლევან ხაბეიშვილის გამარჯვების შემდეგ ის პარტიას არ დატოვებს, თუმცა პოლიტსაბჭოს არჩევნებში მონაწილეობას აღარ მიიღებს.

პარტია „ერთიან ნაციონალურ მოძრაობაში“ არჩევნები დასრულდა. შედეგები პარტიის ოფისში საარჩევნო შტაბის უფროსმა, კობა ნაყოფიამ გამოაცხადა. კობა ნაყოფიას თქმით, ლევან ხაბეიშვილმა ხმების 52.58% მიიღო, ნიკა მელიამ კი – 40%. პარტიის ახალი თავმჯდომარე ლევან ხაბეიშვილი გახდა.

ასევე დაგაინტერესებთ:

* გიორგი კირთაძე ენმ-ს აჭარის ორგანიზაციის თავმჯდომარის პოსტიდან გადადგა

* გიული ალასანია: მიხეილ სააკაშვილის პოზიცია ასეთია, ძალიან დიდ პატივს სცემს ნიკა მელიას, მიაჩნია, რომ ნამდვილი გმირია, მაგრამ დღეს ულოცავს ლევან ხაბეიშვილს